Gallatasaraji do të luante dje në mesditë në Ankara ndaj Gençlerbirliisë (Gençlerbirliği), një ndeshje e vlefshme për Superligën turke. Kemal Bullut kishte vajtur në stadiumin “19 Maji” për të ndjekur të birin, Umut Bullutin (Umut Bulut), sulmuesin e Gallatasarajit, pa e ditur se takimi i shkurtër me të do të ishte i fundit.
Babai i futbollistit 33-vjeçar ishte mes 37 personave që humbën jetën nga një shpërthim terrorist dje në
Ankara. Kemal Bullut po kthehej në shtëpi pasi e kishte parë të birin të luante dhe e kishte takuar për pak minuta. Shpërthimi ndodhi afërsisht një orë pas mbarimit të ndeshjes.
Umut Bullut është pjesë e Gallatasarajit prej tre vitesh, e po ashtu luan dhe për kombëtaren turke. Më 15 mars ai do të mbushë 33 vjeç, e po atë ditë, pra, nesër, do t’i duhet të shtjerë në dhé të atin.
Ekipi i Gallatasarajit ka lajmëruar se do të marrë pjesë i tëri në varrimin e babait të lojtarit të tyre, që do të bëhet në Jeshilhisar, në Kajseri. Në funeral do të jetë dhe ekipi i Kajserisporit. Ngushëllimet nuk kanë munguar të vijnë dhe nga ekipi i Tuluzës në Francë, ku Umut Bullut pati luajtur për një kohë.
Ja ç’thuhet në deklaratën e klubit të famshëm turk të Gallatasarajit: “Kemi mësuar me hidhërim se babai i Umut Bullutit, Kemal Bullut, ishte njëri nga njerëzit që do të humbnin jetën. Klubi dhe lojtarët i shprehin ngushëllimet Umut Bullutit dhe familjes së tij.”
Holandezi Uesli Shnajder, shok skuadre me Umutin, i kushton këto rreshta ngushëlluese kolegut në rrjetin social: “Ngushëllimet e mia më të thella për Umut Bullutin. Jam tejet i pikëlluar për ju dhe për familjen tuaj. Lutjet e mia janë për të gjithë ju.” /tesheshi.com/
