Bjellorusia mbylli kufijtë e saj me Letoninë, Lituaninë, Poloninë dhe Ukrainën të enjten, duke përmendur “situatën epidemiologjike” si arsye, megjithëse lideri i saj e ka minimizuar kërcënimin pandemik për muaj me radhë.
“Ne duhet të mbyllim kufijtë,” tha presidenti Alexander Lukashenko, i cili më parë e kishte përshkruar pandeminë si një “psikozë”.
Sipas të dhënave zyrtare, 96,529 njerëz janë infektuar dhe 973 kanë humbur jetën.
Që nga e premtja, udhëtimi do të kufizohet dhe kufijtë do të mbeten të hapur vetëm për diplomatët dhe trafikun e kamionëve, tha agjensia e kufirit shtetëror.
Ka pasur spekulime se kufijtë janë mbyllur për arsye politike, pasi marrëdhëniet e Bjellorusisë me katër vendet janë përkeqësuar si rezultat i protestave kundër sundimit të Lukashenkos.
Tikhanovskaya: Një shenjë e dobësisë së Lukashenkos
Shumë prej protestuesve u larguan në vendet fqinje për të shmangur arrestimin dhe disa qytetarë bjellorusë u ankuan në fillim të kësaj jave se nuk u lejoheshin të ktheheshin në vend.
Asnjë nga të katër vendet nuk e pranon fitoren e diskutueshme të Lukashenkos në zgjedhjet e gushtit, ndryshe nga aleati kryesor i tij, Rusia.
Megjithëse kjo e fundit ka një nga epidemitë më të rënda të koronavirusit, kufiri ruso-bjellorus mbetet i hapur.
Aktivistja Svetlana Tikhanovskaya, e konsideruar nga shumë njerëz si fituesja e vërtetë e zgjedhjeve dhe aktualisht në mërgim, tha se mbyllja e kufijve ishte një shenjë e dobësisë së Lukashenkos.
“Ai merr vendime që nuk janë menduar mirë, sepse ai është në panik,” tha Tikhanovskaya. /tesheshi.com/
