E përditshmja serbe Vecernje Novosti publikon një shkrim ku i referohet burimeve diplomatike, në të cilin thekson se Gjermania po përgatit një mini “Plan Marshall” për Ballkanin Perëndimor, që do të japë një boom ekonomik në rajon për vitet e ardhshme.
Ky propozim i Berlinit do të vendoset së shpejti në tryezën e Këshillit Europian në Bruksel, pra liderëve vendeve anëtare të BE-së, që do të lançojë një fond special për rajonin tonë.
Vecernje Novosti thekson më tej në shkrimin e saj se plani emërtohet “Berlin Plus” dhe paratë do të sigurohen nga të gjithë vendet anëtare të BE-së, përfshurë Islandën, Liehtenshtejnin dhe Norvegjinë, si dhe Shoqatës për Tregti të Lirë (EFTA), ku anëtar është edhe Zvicra.
Një forum i ngritur posaçërisht për këtë qëllim do të miratojë projektet e mëdha që do të financohen.
“Ideja është për një implementim të shpejtë brenda dy vjetësh, në mënyrë që të krijohet një ambient ekonomik tërheqës në Ballkan”, thekson artikulli i Vecernie Novosti-it.
Fondi do të përdoret edhe në promovimin e bisnesit, kryesisht kompanive të reja dhe të teknologjisë së lartë.
Vecernje Novosti shkruan se një nga synimet e rrjetit të Ballkanit Perëndimor është financimi i projekteve të infrastrukturës, siç është ajo që lidh Serbinë me Bosnjën dhe Beogradin me Tiranën, nëpërmjet Prishtinës.
Siç bëhet e ditur, këto projekte do të hapim shumë vende pune kryesisht për punonjës të kualifikuar dhe qëllimi është përgatitja e Ballkanit për të hyrë në BE.
Me këtë plan synohet gjithashtu të parandalohet seria apo mundësia e shpërthimit të krizave në rajon, që krijojnë gjasa për trazira dhe probleme në të gjithë Europën.
Gazeta serbe thekson se “Berlin Plus” synon të zvogëlojë sa më shumë tensionet në rajon.
Për Gjermaninë, Ballkani Perëndimor ka një rëndësi të madhe për sigurinë europiane dhe pritet që plani të bëhet prezent në korrik në Samitin e krerëve të shteteve të Ballkanit së bashku me kancelaren Angela Merkel, samit që zhvillohet në Trieste të Italisë. /tesheshi.com/
