Kancelarja gjermane Angela Merkel ka përkrahur idenë e presidentit Macron për një ushtri europiane.
“Ne duhet të punojmë me vizionin që një ditë të kemi një ushtri të vërtetë evropiane”, ka thënë Merkel gjatë një fjalimi në Parlamentin Europian në Strasburg, duke shtuar se kjo ushtri evropiane “nuk do të ishte një kontradiktë, por do e plotësonte NATO-n”.
Gjthashtu, kancelarja Merkel ftoi anëtarët e BE-së për solidaritet dhe bashkim dhe theksoi se ata duhet të respektojnë interesat e të tjerëve.
“Është gjithnjë e më e rëndësishme që ne të jemi së bashku si evropianë dhe ne duhet t’i kushtojmë vëmendje interesave dhe nevojave të të tjerëve”, u tha ajo parlamentarëve në një seancë plenare në Strasburg.
Ajo gjithashtu vuri në dukje se euro mund të ketë sukses vetëm nëse të gjithë anëtarët përmbushin detyrimet e tyre sipas traktatit, duke iu referuar çështjes së buxhetit italian.
“Monedha jonë e përbashkët mund të funksionojë vetëm nëse secili anëtar i përmbush detyrimet e tij në lidhje me financat e qëndrueshme”, tha Merkel, duke shtuar se përndryshe forca dhe stabiliteti i eurozonës do të rrezikohet.
Sa i përket krizës së emigracionit, Merkel tha se nëse Bashkimi dëshiron të jetë i suksesshëm në mbrojtjen e kufijve të përbashkët, anëtarët duhet të jenë të gatshëm që të lënë një pjesë të juridiksionit kombëtar mbi kufijtë te agjencia te BE-së, Frontex.
Fjala e Merkelit ishte një vizion për të ardhmen e Evropës, në kuadër të një fjalimi tradicional të udhëheqësve të Unionit të anëtarëve të Parlamentit Evropian. /tesheshi.com/
