Vendet e Grupit të Vishegradit të cilat kanë një qasje të rreptë ndaj krizës emigrantëve, paralajmëruan se ata nuk dëshirojnë të marrin pjesë në një mini-samit evropian mbi këtë çështje që do të mbahet të dielën në Bruksel, organizuar nga Komisioni Evropian, dhe që është interpretuar si një shenjë e mbështetjes për kancelaren gjermane Angela Merkel.
Kryeministrat e Hungarisë, Republikës Çeke, Sllovakisë dhe Polonisë, të mbledhur në një takim në Budpest, pra në “strofullën” e një prej njerëzve simbol anti-emigrant të BE-së, Viktor Orban, vunë në pyetje legjitimitetin e takimit të së dielës, por thanë se do të jetë i pranishëm në samitin e rregullt të BE-së më 28 dhe 29 qershor, që do të mbahet gjithashtu në Bruksel.
“Presidenti i Këshillit të Evropës, Donald Tusk është përgjegjës për organizimin e samitit e jo Komisioni Evropian. Ne e kuptojmë se ai që do të mbahet do të jetë një mini-sami, por ne nuk do të marrim pjesë për shkak se ai nuk është në përputhje me funksionet e zakonshme të BE-së”, ka thënë kryeministri hungarez Viktor Orban.
“Mini-samiti i së dielës është i papranueshëm. Aty duan të ringjallin një propozim të vjetër të cilin e kemi refuzuar tashmë”, tha kryeministri polak Mateusz Morawiecki.
Mini-samiti duhet të përfshijë të paktën dhjetë udhëheqës europianë, duke përfshirë edhe presidentin francez Emmanuel Macron.
Ky mini-samit mblihet në një kohë kur Merkel ndodhet nën presionin e aleatëve bavareze, Bashkimi Social Kristian, të cilët kërkojnë një qëndrim më të ashpër ndaj krizës emigrantëve.
Italia megjithatë do të marrë pjesë në mini-samit, edhe pse kërcënoi një bojkot.
Ministri i Brendshëm Matteo Salvini, ka thënë së ai pret “një propozim të dobishëm në mbrojtjen e kufijve, sigurinë dhe të drejtat e refugjatëve të vërtetë” dhe jo një “zbatim të detyrave të shtëpisë, të paracaktuara nga francezët dhe gjermanët”.
Po kështu edhe kryeministri italian, Giuseppe Conte ka konfirmuar pjesëmarrjen në mini-samit. /tesheshi.com/
