Angela Merkel është rizgjedhur për herë të katërt, kancelare e Gjermanisë me 364 vota pro nga 709 gjithsej në Bundestag. Por, duket se nga një llogaritje e thjeshtë, në votimin e fshehtë, ajo ka marrë 35 vota më pak se 399 vendet që mban koalicioni qeverisës mes CDU/CSU dhe socialdemokratëve në parlament.
Rizgjedhja e Merkelit u bë e mundur pas arritjes së koalicionit të madh me socialdemokratët dhe votes pranuese të bazës së partisë Socialdemokrate më 4 mars. Më vonë gjatë ditës, pritet që ministrat e rinj të qeverisë të betohen përpara se kabineti të mblidhet për herë të parë këtë pasdite.
Zgjedhja e Merkelit nga parlamenti i dha fund 171 ditëve të pritjes pas zgjedhjeve që u mbajtën më 24 shtator 2017. Sfida më e madhe konsiderohet aktualisht përplasja tregtare me SHBA, pas vendimit të Donald Trump për vendosjen e doganave ndaj çelikut dhe aluminit.
Me gjasa, ky do të jetë mandati i fundit në qeverisjen e Gjermanisë për 63-vjeçaren Merkel. /tesheshi.com/
