Një bisedë të përbashkët telefonike do të ketë sot mes tre udhëheqësve kryesorë europianë, kancelares gjermane, presidentit francez dhe kryeministrit britanik, dhe presidentit rus, Vladimir Putin, posaçërisht për Sirinë e për armëpushimin.
Nevoja për respektimin dhe për vazhdimin e armëpushimit në Siri, e hapja e rrugës për një tranzicion të vërtetë politik në vendin e shkatërruar nga lufta, janë temat që do të trajtohen nga Merkel, Hollande e Cameron.
Zëdhënësja e kryeministrit britanik u deklaroi dje gazetarëve se, “Nesër (sot) është një mundësi për udhëheqësit e Britanisë, Francës dhe Gjermanisë që të bëhen bashkë dhe t’ia bëjnë të qartë presidentit Putin se ne duam që ky armëpushim të vijojë, të jetë i qëndrueshëm, e të hapë rrugën për një tranzicion të vërtetë politik.”
Kremlini e ka konfirmuar nëpërmjet zyrës së shtypit të presidencës pjesëmarrjen e Putin-it në bisedën e pritshme telefonike.
Ndërprerja e luftimeve që nisi gati një javë më parë është e para e të tilla përmasave gjatë pesë viteve të luftës. Bisedimet e paqes pritet të nisen më 9 mars nëse armëpushimi mjaft i brishtë vazhdon të respektohet. /tesheshi.com/
