Si kancelare, shumë shpesh i thashë presidentit turk se isha “kancelare e të gjithë gjermanëve”, duke përfshirë edhe ata me origjinë turke, tha Angela Merkel në një intervistë përpara përvjetorit të ribashkimit të Gjermanisë nesër.
Ish-kancelarja tha gjithashtu se ajo i kupton kritikat nga qytetarët, por nuk ka “nuk ka mirëkuptim” për votuesit e Alternativës për Gjermaninë (AfD).
“Për shkak se vitet e fundit kemi shumë njerëz që jetojnë përgjithmonë në vendin tonë, të cilët nuk kanë jetuar gjithmonë këtu, ka një detyrë që ne do të duhet ta marrim përsipër”, thotë ish-kancelarja Angela Merkel në intervistën e saj të parë televizive që nga fundi i mandatit të saj, dhënë në kanalin e dytë të televizionit publik gjerman ZDF. Intervista do të transmetohet nesër, por në pjesët që tashmë janë publikuar, Merkel thekson se në bisedimet e saj me Taip Erdogan, shpeshherë ka qenë pyetja se kush është përgjegjës për njerëzit me origjinë turke që jetojnë në Gjermani si brez i dytë apo i tretë.
“Dhe gjithmonë kam thënë: Shiko, unë jam kancelare e tyre. Gjermania i përfshin të gjithë”, thekson zonja Merkel dhe, duke iu referuar qëndrimit të ekstremit të djathtë për emigracionin, vëren: “Nëse dikush përfiton në kurriz të njerëzve me origjinë dhe pamje të ndryshme, kjo për mua është diçka që nuk e pranoj”.
Duke iu përgjigjur një pyetjeje për pakënaqësitë e qytetarëve të ish-Gjermanisë Lindore në personin e saj, Angela Merkel shprehet: “Kishte disa që ishin shumë të inatosur me mua. Kjo filloi rreth kohës kur euro hyri në telashe. Situata u polarizua kur shumë refugjatë erdhën këtu. Ishte një grup shumë ekstrem, i zhurmshëm dhe intolerant (…) Por, natyrisht, shumë njerëz e panë atë shumë ndryshe. Dhe është pothuajse e trishtueshme që përshtypjen e fundit e lënë më të zhurmshmit”, argumentoi ajo.
Gjatë mandatit të saj, zonja Merkel shmangu referimin e së kaluarës së saj në Gjermaninë Lindore, duke dashur të theksojë se ajo ishte kancelarja e të gjithë gjermanëve.
Megjithatë, në intervistën e saj për ZDF, ajo thotë për jetën e saj në RDGJ: “Me gjithë përpjekjet e saj për të ndikuar te të rinjtë, RDGJ-ja natyrisht që nuk ka arritur të zëvendësojë familjen. Kishim miq, festuam, shkuam me pushime me prindërit. Të gjitha këto ishin eksperienca”, tha ajo dhe sqaroi se ka pasur dallim mes shtetit të RDGJ-së dhe jetës private të qytetarëve.
“Megjithatë, ka edhe përvoja nëpërmjet shtetit që të formësojnë. Dua të them, prania e lirisë i formëson njerëzit, por edhe mungesa e lirisë”, përfundon ajo. /tesheshi.com/
