Kancelarja gjermane Angela Merkel vlerësoi Turqinë për strehimin e miliona refugjatëve sirianë dhe apeloi Europën për të ndarë përgjegjësinë e kësaj krize.
“Turqia ka bërë shumë deri tani për të adresuar problemin e refugjatëve sirianë dhe vijon të bëjë… por zhvillimet e fundit dhe refugjatët që mbërrijnë masivisht në Greqi tregojnë se Turqia ka arritur maksimumin e asaj që mund të bëjë e vetme”, tha Merkel në një dalje për mediat në Berlin.
Për këtë arsye, sipas saj, duhet të nisin bisedimet me Turqinë sesi mund t’i vihet në ndihmë.
Turqia ndan 900 kilometra kufij me Sirinë dhe ka strehuar më shumë se 1.7 milionë refugjatë sirianë e përkujdeset për rreth 200 mijë refugjatë të tjerë nga vende si Iraku, Irani dhe Afganistani. Këto shifra të OKB-së tregojnë për barrë kryesore në përballimin e krizës.
Merkel apeloi vendet anëtare të BE-së të marrin përgjegjësi më të madhe për refugjatët. Gjermania vetë pret 800 mijë refugjatë vetëm këtë vit.
Ajo kritikoi Sllovakinë, ku qeveria tha se do të pranojë vetëm refugjatë të krishterë.
“Të drejtat e njeriut si të drejta universale lidhen ngushtë me Europën dhe historinë e saj”, tha Merkel, duke shtuar se kjo ka qenë nxitja kryesore e themelimit të BE. “Nëse Europa dështon të ndihmojë refugjatët, nëse lidhja mes BE-së dhe të drejtave të njeriut shkatërrohet, atëherë kjo nuk do të jetë më Europa që ne përfytyrojmë”, tha kancelarja. /tesheshi.com/
