Në Kosovë, ka nisur viti i ri shkollor për arsimin e ulët dhe atë të mesëm, e me këtë rast, autoritetet kanë planifikuar vizita në shkolla të ndryshme të vendit. Presidentja Atifete Jahjaga ka përshëndetur me anë të nje mesazhi të gjithë nxënësit dhe mësuesit duke u uruar atyre suksese.
Një urim të veçantë, ka rezervuar ajo, për të gjithë nxënësit e klasave të para, “për ata që po fillojnë një etapë të re të jetës së tyre dhe kur po fillojnë të përgatiten për të nesërmen”.
Jahjaga shkruan se ka vlerësim për e secilit mësimdhënës. “E ardhmja e vendit tonë është në duart tuaja, në përkushtimin dhe angazhimin tuaj për të investuar në fëmijët dhe në rininë e vendit tonë, për t’i përgatitur ata të përballen me sfidat e së ardhmes”, vlerëson presidentja.
Ndërkaq, Jahjaga thotë se institucionet janë të përkushtuara për reformimin dhe avancimin e mëtutjeshëm të sistemit arsimor në Kosovë, duke e vendosur si prioritetin më të madh investimin në arsim dhe edukim të brezave të rinj.
“Uroj që ky vit shkollor 2015-2016 të sjellë ndryshimet e shumëpritura dhe të dëshiruara në ngritje të standardit dhe cilësisë të mësimdhënies dhe mësimnxënies”, shkruan ajo. /tesheshi.com/
