Çelsi është shumë pranë transferimit të një tjetër talenti premtues brazilian, sulmuesin e Fluminenses, Kenedi, i cili po kryen vizitat mjekësore në Londër. Në rast se ai do t’i kalojë ato me sukses, atëherë 19-vjeçari do të bëhet lojtari i tetë karioka i skuadrës së Çelsit. Ramirez ishte braziliani i parë që erdhi në Londrën Perëndimore në gushtin e 2010-ës. Ai erdhi nga Benfika dhe firmosi me blutë që atëherë drejtoheshin nga Karlo Ançeloti.
Lukas Piazon ishte transferimi i dytë, të cilin Çelsi e mori nga duart e Juventusit nga Sao Paolo. Ai zbarkoi në ishull janarin e 2012-ës, një vit pasi ishte arritur akordi në parim për shkak të aplikimit të lejes së punës. Sot 21 vjeç, Piazon nuk ka arritur ende të gjejë hapësirë në ekipin e parë: U huazua te Malaga gjatë sezonit 2013/14 dhe u dërgua te Viteshe sezonin e fundit. Në korrik 2012, Çelsi vulosi marrëveshjen për fantazistin Oskar, i cili erdhi nga Internacionali për 25 milionë paund, dy muaj pasi klubi fitoi Champions-in. Më vonë atë vit, skuadrës iu shtua edhe Uollas për 5 milionë paund. Ai nuk ka luajtur ende për Çelsin, pasi u huazua tek Interi dhe Viteshe.
Blutë mposhtën konkurrencën e Liverpulit dhe Totenhemit për firmën e Uillianit gjatë 2013/14, me mesfushorin i cili firmoi për 5 vite në “Stamford Bridge” nga Anzhi për 30 milionë paund. Vitin pasardhës, Murinjo e shtoi numrin e brazilianëve me Filipe Luisin dhe Diego Kostën nga Atletiko. Në maj të këtij viti ishte radha e mesfushorit 19-vjeçar të Atletiko Paranaenses, Natan, për të firmosur në “Stamford Bridge” dhe me transferimin e fundit të Kenedit, numri i kontingjentit të brazilianëve te Çelsi pritet të shkojë në tetë.
Të tjerat
Çelsi është klubi me numrin më të madh të lojtarëve nga një vend i huaj. Pas tyre vijnë Arsenali dhe Njukasëlli, dy ekipe të kolonizuara nga francezët me nga gjashtë lojtarë për secilën skuadër. Mançester Siti numrin më të madh të lojtarëve të huaj e ka nga Argjentina (5), ndërsa rivalët e tyre të Junajtid prurjen e kanë nga Spanja (4 futbollistë). Te Liverpuli dominojnë brazilianët, por numri i tyre, vetëm 3, është i pakrahasueshëm me Çelsin. Totenhemi ka 4 lojtarë belgë, ndërkohë tek Uotfordi dominojnë natyrshëm italianët (4), pasi edhe pronari i klubit Poco vjen prej andej… /tesheshi.com/
