Ambasadori i Meksikës në Serbi, Marko Antonio Garcia Blanco, tha të mërkurën se ky vend nuk e ka njohur Kosovën dhe se përsëri do të votojë kundër pranimit të vendit në Interpol.
Në një takim me autoritetet brenda Ministrisë së Brendshme të Serbisë, ai tha se ligji ndërkombëtar duhet të respektohet dhe theksoi se qëndrimi i Meksikës me rastin e kandidaturës së Kosovës në Interpol do të mbetet po ai i vitit të kaluar.
Gjatë takimit, zyrtarët serbë falënderuan Meksikën për “mbështetjen e Serbisë dhe respektimin e së drejtës ndërkombëtare” gjë që e ka bërë edhe me rastin e votimit të vitit të kaluar mbi kërkesën e Kosovës për pranim në Interpol.
Më 26 qershor të këtij viti Komiteti Ekzekutiv i Interpolit me seli në Lion të Francës ka vendosur në favor të dërgimit të dosjes së Policisë së Kosovës për votim në Asamblenë e Përgjithshme të Interpolit e cila sivjet mbahet në Kili. /tesheshi.com/
