Zërave që kërkojnë një “mea culpa” të kryeministrit Rama për situatën e krijuar me personat me rekorde kriminale që janë evidentuar së fundmi, nga radhët e të zgjedhurve në PS, u është shtuar edhe ish-presidenti i vendit, Rexhep Meidani. Në një intervistë për gazetën “Panorama”, ai thotë se kryeministri Rama, duhet të paktën të krijojë falje për këtë situatë.
Ish-presidenti Meidani shkon edhe më tej, duke e cilësuar përgjegjësi personale të kryetarit të partisë Socialiste përfshirjen në listat e deputetëve të individëve me të shkuar kriminale.
Ai thotë se këto histori kanë njollosur jo vetëm emrin dhe historinë e grupit parlamentar socialist, por dhe parlamentit shqiptar.
Por, për Medianin, krahas dekriminalizimit, nevojitet ndërmarrja e disa hapave që do të ndreqnin në një farë mënyre, zgjedhjet e gabuara të së shkuarës.
“Hapa, që duhet të shoqërohen me dorëheqje e zëvendësime, pse jo dhe me rregullime tërësore, pas ndryshimeve përkatëse legjislative-kushtetuese, nëpërmjet një procesi të ri zgjedhor, të përgjithshëm ose pjesor”, tha ish-presidenti Meidani. /tesheshi.com/
