Medreseja “Alaudin” në Prishtinë ka reaguar në lidhje me një shkrim të disa portaleve, ku një prani e kandidatit të PDK-së, Shaip Muja në ambientet e saj, është marrë si mbështetje me theks ndaj tij. Kujtojmë se Muja është njeriu që ka penguar ndërtimin e një xhamie në lagjen Veternik të Prishtinë, duke përdorur influencat e tij politike si deputet, dhe këtë për shkak të një lokali që posedohet prej tij afër vendit të ndërtimit të xhamisë.
Për këtë arsye, lajmi i dhënë për motivin e prezencës së tij në medrese, është përkthyer si një “akt dobësie” nga ana e drejtuesve të saj, si një lëshim ndaj Mujës, duke u servirur në finale si përkrahje për kandidaturën e tij. Ndaj, drejtuesi të Alaudin-it janë detyruar që të dalin me një deklaratë publike për të përgënjeshtruar gjithë çfarë është thënë, më saktë spekulluar, për prezencën e Mujës aty.
“Medreseja e mesme “Alauddin” në Prishtinë dëshiron që të informojë opinionin publik se reagon ndaj shkrimit në portalet me titull “Muja merr përkrahje nga profesorët e Medresesë”, të datës 7 qershor.
Medreseja “Alauddin” deklaron se z. Shaip Muja me kërkesë të tij ka qëndruar si mysafir në një vizitë private në shkollën tonë, më datë 6 qershor 2017. Vizita e z. Muja në asnjë mënyrë nuk klasifikohet si vizitë zyrtare në shkollën tonë e aq me pak te kete pasur ndonje takim me stafin edukativ e arsimor dhe me nxenesit tane.
Në shkrimin e lartcekur, mes tjerash potencohet se z. Muja deklaron se ‘Përkrahja ndaj kandidaturës time për Kuvend, nga profesorët e Medresës dhe medresantët, shton obligimin tim ndaj ruajtjes së traditës por edhe të drejtës për të besuar!
Ndaj, Medreseja “Alauddin”, si institucioni Bashkësisë Islame të Republikës së Kosovës dhe shkollë e mesme në kuadër të Ministrisë së Arsimit, e Shkencës dhe e Teknologjisë të Republikës së Kosovës, unanimisht dhe fuqimisht deklaron se është institucion edukativo-arsimor, është apolitik, dhe si rrjedhojë nuk përkrah asnjë parti politike ose individ kandidat për zgjedhje dhe ne kete rast edhe kandidimin e z. Mujes.
Ne si institucion shprehim konsideratën tonë të thellë për të gjitha institucionet dhe qytetarët e Republikës së Kosovës, duke i shërbyer edukimit dhe arsimimit të gjeneratave të reja të vendit tonë, si qëllim i ynë i vetëm prej themelimit”, përfundon deklaratë e Medresesë “Alaudin” në Prishtinë.
Më qartazi akoma, nga informacioni i marrë në rrugë private mësohet se kandidati Muja ka një të afërm të tij në këtë medresë, të cilin ka shkuar ta takojë atë ditë dhe aspak për të marrë ndonjë përkrahje politike. /tesheshi.com/
