Mediat serbe, ato kritike ndaj qeverisë së Vuçiçit, kanë hedhur akuza së në Preshevë po lulëzon trafiku i “ndyrë” me refugjatët e luftës që vijnë nga Siria.
Gazeta opozitare Danas, në një shkrim nga pika kufitare e Miratocit thekson se një grup kriminal ka ngritur prej muajsh një rrjet që u merr para refugjatëve nga Lindja e Mesme për të hyrë në territorin e Serbisë.
Shkrimi që ka autor gazetarin V. Ristiç, thekson se një numër i kufizuar refugjatësh hyjnë tani në territorin e Serbisë, si pasojë e marrëveshjes me Bashkimin Europian.
Deri mbrëmë, vetëm 1300 refugjatë janë regjistruar në qëndrën e ngritur në pikën kufitare të Miratocit në Preshevë.
Duke cituar burime policore, Danas thekson se në këtë pjesë së rrugës ballkanike të refugjatëve ka “një prezencë më të madhe të filantropëve falsë”.
Sipas gazetës, persona të caktuar u ofrojnë refugjatëve udhëtim të sigurtë drejt vendeve të Bashkimit Europian.
Duke cituar burime policore, gazeta thekson se ka emigrantë që hyjnë nga Maqedonia në Serbi dhe prej andej futen në Kosovë, nga ku arrijnë Malin e Zi dhe Bosnjë-Hercegovinë, e më pas arrijnë Kroacinë si vend i Bashkimit Europian.
“Një numër jo i madh refugjatësh hipin në autobusë dhe mikrobusë dhe arrijnë kufirin kroat pranë qytetit Sid”, thuhet në shkrim.
Danas shkruan se transporti bëhet nga një kompani autobusësh me qendër në Preshevë dhe që më pas mbërrijnë në qytetin e Dobrosin që ndodhet 20 kilometra larg.
“Bëhet fjalë për një zonë malore që krijon një mundësi perfekte për të hyrë në territorin e Gjilanit dhe më pas në Prishtinë”, thuhet aty.
Gazeta thekson se i gjithë ky udhëtim bëhet nën syrin vëzhgues të policisë serbe, asaj maqedonase dhe policisë së Kosovës, të cilat çuditërisht kanë marrëdhënie perfekte në “mbarëvajtjen” e udhëtimit të trafikut të qenieve njerëzore që poi kin nga lufta.
Danas nuk kursen as ndërkombëtarët, të cilët sipas tyre e vëzhgojnë situatën nga larg.
Përgatiti Ylli Pata – /tesheshi.com/
