Britania i ka dërguar notë proteste Surinamit për shkak të tërheqjes së vendimit për njohjen e pavarësisë së Kosovës. Të paktën kështu, citojnë mediat e Beogradit të ketë thënë ministri i Jashtëm serb, Ivica Daçiç.
“Pa marrë parasysh se disa vende të mëdha thonë se janë miqtë tanë, duhet të them se njëra nga këto vende të mëdha, Britania e Madhe, i ka dërguar notë proteste Surinamit për shkak të tërheqjes së vendimit për njohjen e pavarësisë së Kosovës”, citon “B92” Daçiçin.
“Na gëzon vendimi i Surinamit për tërheqjen e njohjes, e po ashtu edhe qëndrimi i Guinea Bisaos, që tregon se pushteti aktual është në anën e mbrojtjes së integritetit territorial dhe të sovranitetit të Serbisë”, ka thënë ai.
Sipas Daçiç, dokumenti të cilin autoritetet e Prishtinës e përdorin si argument se Guinea Bisao ka njohur pavarësinë e Kosovës, nuk ka kaluar nëpër procedurat legale në këtë vend afrikan dhe autoritetet vendore e konsiderojnë të falsifikuar (mediat serbe dje thanë se ai nuk ishte me alfabet cirilik, por latin, prandaj Serbia nuk e konsideron të vlefshëm), shkruan Kohanet.
Daçiç citohet të ketë thënë se “në dritën e zhvillimeve në Katalonjë, në botë ka gjithnjë e më shumë pikëpamje që flasin për pasojat e njohjes së pavarësisë së Kosovës e Metohisë. Tajvanin një kohë e kishin njohur 70 vende, por shikoni sa është numri i tyre sot. Edhe Jugosllavia e kishte njohur Saharanë Perëndimore, por e tërhoqi atë njohje”.
Ndërkohë, nga institucionet në Kosovë nuk ka pasur ndonjë njoftim për këtë notë proteste të Britanisë drejtuar Sirunamit, siç pohon ministri i Jashtëm i Serbisë. /tesheshi.com/
