Sipas portalit në gjuhën maqedonase Libertas, në selinë e BDI-së në Reçicë të Vogël para tërë lidershipit të BDI-së ka ndodhur një rrahje natën e 11 dhjetorit, kur kanë dalë rezultatet e zgjedhjeve.
Burime partiake për Libertas kanë thënë se pasi kanë rritur në seli rezultatet e para negative, posaçërisht nga vendvotimet në Çair, drejtori i Agjencisë për investime të huaja, Arlind Zeqiri gjoja ka komentuar me zë: “Çka mund të presim ne kur shef të shtabit zgjedhore e kemi Bekim Nezirin, kurse të gjithë e dimë shumë mirë se kush është ai dhe çka mendojnë votuesit për të”.
Ndaj këtyre akuzave verbale, sipas burimeve të Libertas, ka reaguar vetë Neziri duke e sulmuar fizikisht Zeqirin, me ç’rast janë shkëmbyer grushte dhe shqelma mes tyre, kurse të tjerët që kanë qenë prezent mezi i kanë ndarë.
“Të mëdha janë ndarjet në këtë parti, posaçërisht pas dështimit të pritur, respektivisht pas dënimit nga elektorati i partisë për politikat e gabuara dhe parasëgjithash për krimin dhe korrupsionin nga ana e funksionarëve në kurriz të qytetarëve që jetojnë në frikë dhe varfëri. Libertas nuk arriti të sigurojë qëndrim zyrtar nga BDI lidhur me këtë ngjarje në Reçicë të Vogël”, shkruan portali Libertas. /tesheshi.com/
