Ish-kryeministri, Pandeli Pandeli Majko ka mbajtur një fjalim të fortë në Kuvend ku ka deklaruar se këtë parlament e ka marrë lumi dhe se klasa politike shqiptare është kthyer si klika e vjetër politike.
Duke ju drejtuar Berishës, Majko tha:
“Po mirë mo Doktor dhe ju kolegë të PD gjatë kohës që keni zbuluar të gjitha këto fakte me krime, kriminelë. Jam kurioz të di, ky Prokurori i Përgjithshëm që nuk përmendet asnjëherë në asnjë rast si një njeri që mban përgjegjësi për një opozitë që çdo ditë paraqet fakte me shkrim, me gojë. Pse nuk vepron Prokuroria e Përgjithshme, pse nuk vepron Prokurori i Përgjithshëm? Pse nuk e përmend emrin e Prokurorit të Përgjithshëm”?
Më pas, ish-kryeministri shpalosi dhe fjalën më të fortë: “E vërteta është që ne kemi krijuar një sistem të paprekshmish që qëndrojnë në këtë sallë dhe, vini vizën: këtej janë këta, këtej ne e bardha, nuk ka vizë. Nuk po them se janë ëngjëj këta dhe as ne. Ekziston një situatë tepër e rëndë psikologjike. Ne po e rrëzojmë me duart tona të gjithë sistemin që kemi ngritur nga ’92.
Do bëhet 25-vjetori i Lëvizjes së Dhjetorit, çfarë do t’u themi? Këtë ku jemi katandisur tani do t’u themi që kemi realizuar? Tre çereku ynë u ngjan anëtarëve të Byrosë Politike të ’90 të matufepsur komplet, të marrë fund, pa histori. Ulërasim këtu për kriminelë dhe histori të tjera. Po bëhet rutinë dhe unë hyj tek ata deputetë që qëndrojnë gjatë gjithë seancës dhe dëgjoj edhe gjëra që nuk më pëlqejnë.
Këtu në parlamentin tonë rregulloren e parlamentit e ka marrë lumi mirë, nuk dihet kush është rendi i ditës, koha e të folurit dhe nuk po merret vesh sesi fillon dhe si mbaron seanca parlamentare. Këtu është seancë, kushdo vjen, flet sa të dojë, shan sa të dojë, flet si të dojë dhe publikun me të drejtë e ka marrë neveria për ditën e enjte për atë që dëgjon në parlament. Sot normalisht gjithë bota diskuton rrezikun e terrorizmit, në parlamentin e Shqipërisë qeveria shpallet e gjitha kriminale dhe kryeministri i vendit kryekriminel”.
/tesheshi.com/
