49 është numri i të vdekurve dhe 12 ai i të plagosurve pas një përleshjeje në një burg të Meksikës.
Ngjarja ndodhi në burgun Topo Chico, në qytetin industrial të Monterrey-it, në veri të Meksikës. Siç informon guvernatori i Nuevo Leon-it, Jaime Rodriguez, përleshja nisi pas një debati të anëtarëve të një klani droge për kontrollin mbi burgun.
Të burgosurit u përfshinë në një përplasje masive mes tyre, duke u vënë zjarrin dhe ambienteve të burgut. Ndërkaq po hetohen dhe raportimet për përdorim të armëve të zjarrit.
Forca të shumta policore kanë mbërritur për ta vënë nën kontroll burgun, ndërsa nuk është arratisur asnjë i burgosur.
Burgu i ndërtuar para 60 vitesh mban në të 3.800 të burgosur, dyfishin e kapacitetit të tij, dhe mbikëqyret nga 100 roje.
Ngjarje të tilla janë të zakonshme në burgjet e mbipopulluara të Meksikës. /tesheshi.com/
