Kryeministri Rama avokoi veten në lidhje me çështjen “McGonigal”, kësaj here para opozitës në parlament, pasi kjo e fundit kërkoi një mocion me debat, krahas një komisioni hetimor që këmbëngul të formohet.
Rama tha se gjithçka pretendon opozita, janë pretendimet e saj konspiracioniste pa asnjë bazë.
“Nuk kam ardhur këtu për ta, por për respekt të zgjedhësve dhe deputetëve të shumicës, që nuk mund të lija vetëm për këtë mocion absurd, me absurdi i historisë të Kuvendit, një marri konspirative që prodhuesi i filmave të Hollivudit do ta refuzonin si një shthurje delirante të fantazisë njerëzore”, tha ai.
Përmendjen 14 herë e emrit të tij në aktakuzën ndaj zyrtarit FBI-së, fakt te cili opozita sheh djallin, Rama e arsyetoi duke thënë se në ato 14 herë nuk ka ndonjë akuzë ndaj tij nga drejtësia amerikane. “Po e vërtetë është që hëngra darkë me McGonigal. Dhe më ka ftuar ai mua. Dhe ku është krimi këtu? Hera e dhjetë, mbrojtja e të akuzuarit dështoi të provojë se i akuzuari i ka raportuar takimet edhe udhëtimet. Pra, këtu flitet për të akuzuarin që nuk ka bërë sipas ligjeve të tyre, detyrën e tij. Po ku hyn këtu krimi im? Se i raportoi ai apo jo qendrës që më takoi mua?”, ishte një nga arsyetimet e kryeminmistrit.
Pas një vetëavokimi të gjatë 45 minutësh, Rama u largua nga salla, duke patur më parë këtë epilog të fjalë së tij:
“E kam thënë se nuk do ta furnizojë më me energjinë time zjarrin e përditshme të politikës së përplasjes, nuk i shkoj pas avazit një opozite që përsërit vetëveten, fatkeqësisht jam përfshirë edhe unë asaj mase të errët që i ka huajtur njerëzve politiken, duke i bërë të mendojnë se të gjithë ne jemi një jashtëqitje masive e kombit, e ndarë përgjysmë.
Flisni bërtitni, shpifni, shani, sajoni, protestoni sa të doni, por nderin e përballjes me mua, pa karar dhe orar, nuk do ta keni për ta pasur më. Mos u shkulni kurrë nga revolucionet tuaja imagjinare për rrëzimin tim, por mua nuk do të më keni më palë. Keni hyrë në vitin e 10-të kur më keni rrëzuar çdo vit, keni mbledhur 100-200 mijë njerëz 120 herë, 60 herë jam fshehur në malin e Dajtit, më keni mundur në zgjedhjet e 9 viteve të fundit, jam i bindur që kjo e 10-ta e 14 majit do të jetë fitorja juaj më e madhe. Më 14 maj, do të merrni jo vetëm Tiranën dhe Elbasanin, por edhe Vlorën edhe Uashingtonin”. /tesheshi.com/
