Një seri “gabimesh të papërshkrueshme dhe të pamenda” nga ekuipazhi çuan në mbytjen e anijes që vrau sipërmarrësin britanik të teknologjisë Mike Lynch dhe gjashtë të tjerë në fillim të kësaj jave, tha ekzekutivi i prodhuesit të jahteve për Reuters.
Jahti Bayesian me flamur britanik, një jaht luksoz 56 metra që mbante 22 persona – 12 pasagjerë dhe 10 anëtarë të ekuipazhit – u përmbys dhe u fundos të hënën, disa minuta pasi u godit nga një stuhi para agimit ndërsa ishte ankoruar në brigjet e Sicilisë veriore.
“Anija e pësoi nga një sërë gabimesh të papërshkrueshme, të paarsyeshme. Në atë anije ndodhi e pamundura…u mbyt sepse u fut uji”, tha Giovanni Costantino në një intervistë për Reuters.
Costantino drejton grupin italian Sea, i cili përfshin Perini Navi, një prodhues italian i varkave me vela dhe jahteve të nivelit të lartë, ku është ndërtuar dhe Bayesian në 2008. Jahti ka patur dy herë remonte, së fundmi në 2020, por jo në Perini.
Shefi ekzekutiv përjashtoi çdo gabim projektimi ose ndërtimi, të cilin ai i quajti të pamundur pas 16 vitesh lundrimi pa probleme, duke përfshirë kushtet më të këqija të motit se të hënën.
Ai fajësoi ekuipazhin e Bayesian-it për një “gabim të pabesueshëm” sepse ata nuk ishin të përgatitur për stuhinë, e cila ishte e parashikuar dhe jo e befasishme.
Costantino tha se pasagjerëve duhet t’u ishte kërkuar të linin kabinat e tyre dhe të mblidheshin në një vend të sigurt ndërsa jahti përgatitej për stuhinë, duke përfshirë ngritjen e spirancës dhe mbylljen e dyerve, ndër masat e tjera.
Gjashtë nga 12 pasagjerët vdiqën në aksident, dhe shërbimet e urgjencës janë ende duke u përpjekur për të gjetur trupin e personit të fundit të zhdukur, vajzës së Lynch, Hanna.
“Po të ishin ndjekur procedurat, të gjithë pasagjerët do të kishin rënë në gjumë pas një ore dhe të lumtur do të vazhdonin lundrimin e tyre të mrekullueshëm mëngjesin tjetër”, tha Costantino.
Një tjetër jaht i ankoruar pranë Bayesian-it e kaloi stuhinë pa pasoja.
Kapiteni i jahtit të fundosur dhe anëtarët e tjerë të ekuipazhit nuk kanë komentuar publikisht aksidentin, ndërsa prokurorët italianë që hetojnë aksidentin janë planifikuar të mbajnë një konferencë për shtyp të shtunën.
