Opozita e mbylli protestën e saj pas gati 3 orësh, ku në fillim u përqëndrua para kryeministrisë, madje dhe duke i rënë disa herë rreth e rrotull asaj, e më pas duke u zhvendosur para parlamentit, ku edhe pse brenda tërësisht heshtje, godina shihet tashmë vetëm simbol pushteti. Më pas, gjithçka përfundoi te sëlia e PD-së, ku Basha kumtoi mesazhin e radhës, duke përcjellë bindjen se këtë 16 mars ishin dhe më shumë njerëz se në 16 shkurt.
Me një stil patetik, ai tha:
“E gjithë Shqipëria dhe bota e ka parë sot vendosmërinë e një populli të bashkuar për liri dhe demokraci për t’i dhënë fund pandëshkueshmërisë së Ramës dhe klikës së tij. Pa ju, pa zemrat tuaja, kreshnike, ju o viganë mbrojtës të lirisë dhe demokracisë ky vend do të ishte rreshtuar krah popujve pa liri. Ne e kemi ndalur dhe do ta hedhim në lum qeverinë e tij kriminale dhe parlamentin e tij të krimit. Nuk ka rrugë tjetër përveç protestave popullore. Jemi shumë më shumë sot në 16 mars. 16 shkurti i hapi rrugën një vërshimi popullor që nuk do të ndalet por do të vijojë kundër grushtit të kriminelëve në pushtet”, tha Basha.
Ai rezervoi më pas një mesazh për ndërkombëtarët me këto fjalë: “Dua t’i dërgoj një mesazh të qartë miqve tanë perëndimorë: nuk ka stabilitet pa demokraci! Mos dëgjoni Ramën, por zërin e njerëzve dhe të qytetarëve. Kjo që kemi nisur nuk do të zvogëlohet. Ne nuk do ta ulim kokën dhe nuk do ta pranojmë t’i themi legjitime një qeverie të lidhur me krimin”, theksoi kreu demokrat. /tesheshi.com/
