Ndotja e ajrit është bërë shqetësimi i ditës në kryeqytetin e Bosnjë-Hercegovinës, duke i detyruar autoritetet arsimore të marrin vendimin për ndërprerjen e mësimit.
Ministria e Arsimit ka pohuar se mësimi në të gjitha shkollat e Sarajevës do të pezullohet nga sot për shkak të ndotjes së ajrit.
Siç njofton faqja elektronike bosniatoday, Federata e Unioneve të Pavarura i dërgoi dje një kërkesë ministrisë për pezullimin e mësimit.
“Për shkak të ndotjes së ajrit … e nxisim ministrinë të marrë vendimin për pezullimin e mësimit në shkollat … në Kantonin e Sarajevës, me synimin e mbrojtjes së jetës dhe shëndetit të fëmijëve tanë. Fëmijët kanë për të qenë mirënjohës, si edhe mësuesit e prindërit e tyre, e kushdo që e di se shëndeti e siguria e fëmijëve duhet të jetë një përparësi,” thuhet në kërkesën e federatës.
Ministri i Arsimit do të sqaronte se vendimi u mor pas informacioneve se shumë fëmijë po vuanin nga probleme shëndetësore për shkak të ndotjes së ajrit.
Ndotjes së ajrit në Sarajevë i është bashkuar dhe mjegulla e dendur, që zgjat prej një muaji, me përjashtim të ca ditëve të kthjellëta. Gjatë ditëve të shkuara ka patur dhe pezullime të fluturimeve në aeroportin e Sarajevës për shkak të mjegullës; një fenomen i rëndomtë në këtë aeroport gjatë stinës së dimrit. /tesheshi.com/
