Dy ndeshjet e fundit të grupit B në Euro 2016 janë pritur më tepër me padurim për të mësuar se në ç’pozita do të ishte skuadra e vendit të tretë, e a do mundej që Shqipëria ta linte pas atë.
Ndërsa Uellsi e ka bërë detyrën më së mirë, Anglia ka zhgënjyer me një barazim pa gola ndaj Sllovakisë. Çka i bën sllovakët që të zënë vendin e tretë, me 4 pikë, më lart se Shqipëria e 3 pikëve.
Uellsi fitoi 3-0 ndaj Rusisë, duke zënë vendin e e parë në grup, me 6 pikë pas dy fitoresh e një humbjeje, e, në të njëjtën kohë, duke i prerë biletën Rusisë për kthimin në shtëpi. Rusët konfirmohen si një prej skuadrave më të dobëta të turneut europian, me vetëm një pikë të siguruar pas një barazimi aksidental me Anglinë.
Edhe një herë tjetër uellsianët u udhëhoqën nga Gareth Bale, që shënoi njërin prej golave, i treti për të në tre ndeshje. Ramsey e Taylor ishin shënuesit e dy golave të tjerë.
Anglia dhe Sllovakia nuk i ndryshuan gjë në 90 minuta rezultatit të fillimit të lojës. Anglezët e nisën lojën me rreshtimin në sulm të dy lojtarëve që i dhanë fitoren ndaj Uellsit, Sturridge dhe Vardy, por Hodgson parapëlqeu të linte në stol Rooney-n, të cilin do ta fuste në fushë vetëm në pjesën e dytë.
Anglezët patën 11 goditje nga këndi kundrejt asnjë të sllovakëve, e zotëruan topin në 65 për qind të lojës, e goditën portën 18 herë, me 7 prej gjuajtjeve brenda kuadratit, por nuk arritën ta tundnin rrjetën kundërshtare.
Takimi përfundoi 0-0; Anglia u rendit përfundimisht e dyta në grup, me 5 pikë. /tesheshi.com/
