Sundimtari më i gjatë në shërbim të Britanisë, Elizabeth II, feston ditëlindjen e saj të 95-të të mërkurën, 21 prill, e cila do të jetë krejtësisht e ndryshme nga ato të mëparshme pasi do të jetë ditëlindja e parë që ajo nuk do të festojë në shoqërinë e burrit të saj të dashur Philip.
Media të shumta botërore tashmë kanë filluar të spekulojnë gjerësisht se Princi Harry mund të qëndrojë në Mbretërinë e Bashkuar për disa ditë në mënyrë që Mbretëresha të mos jetë vetëm për ditëlindjen e saj.
Princi Harry ka shprehur dëshirën të qëndrojë në Mbretërinë e Bashkuar të paktën deri të mërkurën si një gjest ndaj Mbretëreshës, shkruan Express.
Në kolonën e tij të fundit, gazetari Richard Kay, i cili shkruan për familjen mbretërore për vite me radhë, pohon se Harry ka një biletë kthimi në SHBA, se ai dëshiron të kthehet te gruaja e tij Meghan e cila është shtatzënë, por që ai gjithashtu dëshiron të qëndrojë me gjyshen e tij për ditëlindjen e saj.
Nga ana tjetër, Victoria Arbiter, tha se do të ishte mirë nëse Harry mund të ishte pjesë e ditëlindjes së Mbretëreshës.
Sidoqoftë, një vendim zyrtar nëse Princi Harry do të qëndrojë në Mbretërinë e Bashkuar për ditëlindjen e Mbretëreshës ende nuk është marrë. Kujtojmë, Princi Philip u varros disa ditë më parë, dhe përshëndetja e fundit e princit u ndoq nga vetëm anëtarët më të ngushtë të familjes.
Varrimi i tij ishte një mundësi ideale për familjen mbretërore për t’u ribashkuar dhe zgjidhur marrëdhëniet e prishura. Nëse do të ketë sukses në këtë, mbetet të shihet. /tesheshi.com/
