Një ditë pas ngjarjeve të rënda, zakonisht bëhet bilanci. Nis numërimi i viktimave dhe i atyre që kanë arritur t’i shpëtojnë vdekjes në një mënyrë apo në një tjetër. Brukseli është zgjuar sot në qetësinë e një qyteti të goditur në zemrën e tij nga një atentat i dyfishtë në aeroport.
Pas kësaj heshtjeje qëndron jehona e ulërimës që ka tronditur sërish Europën dhe historitë e të mbijetuarve, të cilët falenderojnë fatin që janë ende gjallë dhe pyesin se përse ka kaq shumë urrejtje në botë.
Një ndër historitë më të pabesueshme është ajo e francezit Lahouani Ziahi, i cili i mbijetoi 13 nëntorit të kaluar, atentatit të Bataclanit në Paris si dhe shpëtoi edhe ditën e djeshme në Bruksel. “Nuk ndihem me fat të madh”, thotë ai i trembur ndërsa shton: “Ndihem më shumë i përndjekur”. Një rastësi shumë e frikshme kjo që i ka ndodhur këtij të riu, i cili i shpëtoi vdekjes makabre në World Trade Center të New Yorkut më 11 shtator si dhe atentatit në kryeqytetin francez gjatë koncertit të Eagles of Death Metals.
Por, ky nuk është i vetmi që ka këtë fat. Pietro Consorti, një italian i cili po kthehej në Milani pasi kishte qenë në New York, ishte jashtë aeroportit duke pirë një cigare në momentin e shpërthimit. Avioni i tij nisej në mesditë nga Brukseli. Koha e nevojshme për të marrë pak ajër jashtë ambienteve të aeroportit i shpëtoi jetën.
Jean-Luc, një tjetër i mbijetuar, tregon se ishte në tualet. Kur doli e gjeti veten përballë një situate me njerëz të vdekur, si në filmat horror. “Një person më goditi. Kishte kudo njerëz që vraponin dhe të tjerë të plagosur në tokë”,- rrëfen ai. Tregime me të vërtetë të frikshme dhe ende më të frikshme janë skenat që kanë parë sytë e të mbijetuarve nga ky sulm terrorist. /tesheshi.com/
