Një raport i një organizate joqeveritare flet për mijëra të zhvendosur e të larguar nga Mosuli që prej tetorit të vitit të shkuar, kur forcat irakiane nisën betejën për ta nxjerrë ISIS-in jashtë tij e për ta rimarrë qytetin.
Sipas raportit të Organizatës Ndërkombëtare për Migracionin, të bërë të njohur këtë të dielë, më shumë se 200.000 njerëz janë zhvendosur për shkak të përplasjes ushtarake në Mosul.
Rreth 45.000 persona janë larguar nga pjesa perëndimore e qytetit nga shkurti e këtej, kur dhe filloi mësymja për marrjen e saj.
Al Jazeera raporton për një kritikë të hapur të një zyrtari të lartë shtetëror irakian ndaj përpjekjeve të pamjaftueshme të OKB-së për t’i ndihmuar të zhvendosurit nga pjesa perëndimore e Mosulit.
“Fatkeqësisht ka një deficit të dukshëm në punën e këtyre organizatave [të OKB-së],” deklaroi ministri për migracionin dhe zhvendosjet, Jassem Mohammed al-Jaff.
Përkundër kësaj, OKB-ja e përshkroi si “përparësi kryesore” ndihmën e dhënë për të zhvendosurit.
Në terren, teksa luftohet për pjesën perëndimore të qytetit, gjysma lindore e tij u shpall në janar plotësisht e çliruar. /tesheshi.com/
