E njoftuar me bujë, marrëveshja mes SHBA-së dhe Rusisë për Sirinë, që parashikon dhe një armëpushim disaditor, është shoqëruar në terren nga bombardime masive, që kanë lënë të vdekur mbi 100 civilë.
Halepi dhe Idlibi, në veri dhe në veriperëndim të Sirisë, kanë qenë nën shënjestrën e sulmeve ajrore.
Në Idlib është goditur një treg, i mbushur plot me njerëz që po blinin në pritje të Bajramit. Nga ky sulm kanë humbur jetën 55 civilë, ndërkohë që janë plagosur 90 të tjerë.
Më së paku 46 civilë, mes të cilëve nëntë fëmijë, janë vrarë në Halep, pas bombardimeve në zonat e kontrolluara nga kryengritësit.
Këto sulme, siç raporton Al Jazeera, janë kryer nga avionët luftarakë sirianë, pa përjashtuar praninë e bombarduesve rusë.
Bombardimet u kryen vetëm pak orë pasi shefat e diplomacisë amerikane dhe ruse arritën një marrëveshje armëpushimi në Gjenevë. Marrëveshja parasheh nisjen e një armëpushimi në tërë Sirinë në të ngrysur të së hënës. /tesheshi.com/
