LSI doli këtë të hënë me konkluzionin se për cështjen e ligjit të mbetjeve duhen dëgjuar me vëmendje të dyja palët. Dhe këtë, kreu i grupit parlamentar të kësaj partie, Petrit Vasili e tha pasi dhe vetë i dëgjoi dy palët me vëmendje gjatë një takimi me ta.
“Besoj se është një ditë për të dëgjuar me shumë vëmendje gjithçka dhe sigurisht nga dëgjimi i vëmendshëm lind edhe reflektimi. Sot ishte dita për t’u thelluar në këtë argument, i cili është delikat, imponon një seriozitet të lartë shoqëror në radhë të parë dhe si i tillë është mirë që pas dëgjimit të jemi akoma më të ndërgjegjshëm për gjithçka që lidhet me fenomenin, zgjidhet ligjore të tij dhe gjithçka tjetër. Kjo, në mënyrë që të gjithë të jemi të qetë edhe si politikanë edhe si qytetarë për të gjitha vendimet që marrim për sot por dhe për nesër”, tha Vasili.
E më pas, numri dy i LSI-së kaloi tek çështja tjetër, ajo e drogës, teksa u pyet rreth propozimit të bashkëpartiakut të tij, ministrit të Drejtësisë, Ylli Manjani, për angazhimin e ushtrisë kundër kanabisit. Edhe në këtë rast, përgjigja e tij ishte ajo e tipit “as mish as peshk”:
“Besoj se gjithmonë kur flitet për një fenomen kriminal siç është kanabisi duhet të jemi vetëm shumë serioz dhe shumë të shqetësuar”, ka kreu i grupit të LSI-së. /tesheshi.com/
