Ka mbërritur rezultati i parë i marrëdhënieve mes Edi Ramës dhe Zoran Zaev pas takimit të zhvilluar në Trieste një javë më parë.
Shefi i diplomacisë maqedonase, Nikola Dimitrov ka mbërritur në Tiranë për një vizitë zyrtare, ku pas një takimi me homologun e tij shqiptar Ditmir Bushati, ka shpallur se ligji i gjuhës shqipe do të kalojë në parlamentin e Maqedonisë shumë shpejt, ndërkohë që u anonçua zhvillimi i një mbledhje të përbashkët mes qeverive të Shqipërisë dhe asaj të Maqedonisë.
“Në vijim të bisedës së dakortësisë së dy kryeministrave Zaev dhe Rama në Trieste, bëj të ditur se kemi arritur një marrëveshje, për të zhvilluar mbledhjen e parë të qeverisë të përbashkët, gjate këtij viti, pra vjeshtën e ardhshme në Pogradec. Kjo do të jetë për të lehtësuar projektet strategjike, të ndihmuara dhe nga ndërkombëtaret”, tha Bushati.
Ndërkohë Dimitrov deklaroi se vullneti i Shkupit është që bashkëpunimi mes dy vendeve të jetë totalisht në ddobi të qytetarëve të Shqipërisë dhe Maqedonisë.
“Sot kam nder të jem këtu dhe të përfaqësoj Maqedoninë. Është vizita e parë që unë si ministër i bëj Shqipërisë dhe Tiranës. Kemi pasur biseda konstruktive. Mendoj se ka shumë potencial dhe vendet tona kanë një bashkëpunim shumë të fortë dhe zhvillojnë një vizion të përbashkët të Unionit Evropian.
Një bashkëpunim në të gjitha fushat, do ju ndihmojë edhe juve dhe ne që të ecim përpara, pasi duhet të punojmë me vendosmëri si gjithë Ballkani.
Une mund të them që jemi marrë vesh që do bëjmë jo vetëm deklarata politike. Por ato pika që kemi diskutuar ti kalojmë në projekte konkrete për gjithë qytetarët”, tha Dimitrov.
/tesheshi.com/
