Hamburgu nis të japë shenja mëkëmbjeje e të shtojë shpresat për një qëndrim në Bundesligë me një fitore ndaj Bajer Leverkusenit.
Takimi i së premtes ndaj “aspirinave” ishte i pari i javës së 19-të të kampionatit gjerman. Hamburgu, në vështirësi këtë sezon, do të mbështetej nga më tepër se 45.000 shikues në shkallët e “Volksparkstadion”-it.
Një mbështetje që do të shpërblehej me një fitore 1-0, e para për këtë vit për Hamburgun, e katërta gjatë këtij kampionati.
Mavraj do të bënte një ndeshje mjaft të mirë; goli po ashtu do të vinte nga shoku i tij në qendër të mbrojtjes. Greku Papadopoulos, i huazuar këtë janar ironikisht nga Bajer Leverkuseni, e që pjesën e parë të kampionatit e pati çuar me Lajpcigun, do të shënonte në minutën e 76-të golin e vetëm të ndeshjes.
Fitorja e ngjit përkohësisht Hamburgun në vend të 16-të, me 16 pikë. Mundësia për të mbijetuar është e madhe, pasi diferenca në pikë mes skuadrave në gjysmën e poshtme të klasifikimit nuk është aspak e pambyllshme.
Mbrojtësi i kombëtares shqiptare u fiksua nga kamerat pas ndeshjes teksa përqafohej me shokët e skuadrës; ai mori një vlerësim mjaft të mirë për atë që dha në fushë. /tesheshi.com/
