E gjithë fshesa e nisur tashmë në administratën shqiptare për të ndaluar influencën e pushtetit tek votuesit, nuk është një plan që ka ardhur si pasojë e një studimi apo investigimi të Partisë Demokratike.
Realisht Basha dhe ekipi i tij kanë vepruar pa një plan të qartë apo të detajuar se çfarë ndodh në administratë, ose kanë dhënë një qëndrim duke iu referuar mënyrës sesi qeveria e PD-së ka funksionuar kur ishte në pushtet.
Burime diplomatike bënë të ditur se të gjitha lëvizjet e Task-forcës dhe ministrave teknikë janë pasojë e një dokumenti preciz të hartuar nga OSBE dhe që ka piketuar me kohë ku janë pikat nevralgjike ku luhet influenca, apo trafikimi e blerja e votës.
Gjithçka nisi nga zgjedhjet vendore të vitit 2015 kur Vora ishte qendra dhe laboratori nga ku u arrit të hartohej një databazë i saktë i këtij mekanizmi.
Siç mësohet ky material i është dorëzuar të gjitha partive politike pas zgjedhjeve vendore të 21 qershorit 2015 nga vetë ish-kryevëzhguesja Audry Glover, e cila takoi personalisht Edi Ramën, Lulzim Bashën dhe Ilir Metën.
Madje ky plan ka qenë edhe baza e Bashës për të mbështetur lëvizjen e tij të çadrës, për të legjitimuar alarmin për një fabrikim të votës.
Por ndërkombëtarët i kërkuan atëherë Bashës që ta bazojë aksionin e tij të garancisë mbi këtë material dhe jo ta shtojë me kërkesa të parealizueshme, siç është qeveria teknike apo shtyrja e zgjedhjeve.
Raporti ka qenë preciz dhe i detajuar qark për qark, duke shënuar të gjitha qëndrat e pushtetit që mund të ndajnë influencë për votimet.
Shumnë vetëve u ka bërë përshtypje se pse Edi Rama i dha opozitës përveç ministrave dhe të gjitha korporatat e mëdha shtetërore si OSHE, AZHBR apo ALUIZNI.
Realisht opozita nuk i kërkoi fare ato, por kanë qenë zyrtari i DASH-it, Hoyt Brian Yee, që i ka deklaruar Lulzim Bashës, që pas një dyshimi të shprehur nga OSBE-ja, Edi Rama ka rënë dakord që të dorëzojë dy kompanitë e mëdha shtetërore, që kanë shumë punonjës, por edhe mund të influencojnë me kontrata energjie apo certifikata legalizimi.
Edi Rama ka pranuar që të heqë nga fushata e tij një nga “hipotekat” më të rëndësishme të punës së tij 4-vjeçare, procesin e legalizimeve ku u arrit që të formalizoheshin më shumë se 100 mijë banesa në të gjithë vendin.
Në të gjithë takimet e zhvilluara deri tani, Rama po flet pak ose aspak për këtë proces, pasi i është vënë kusht nga ndërkombëtarët që të mos e kapitalizojë.
Plani përfshinte realisht, sidomos strukturat vertikale të LSI-së, që nga drejtoritë arsimore që ajo kontrollon, spitalet, por mbi të gjitha drejtoritë e burgjeve dhe hipotekat.
Janë mbledhur prova të forta nga ndërkombëtarët ku punonjësve të policive të burgjeve u është bërë presion mbi vendin e punës me votat e tyre.
Ndërkohë që në hipoteka kjo po shtrihej në dokumentet e regjistrimit të banesave, të cilat përfitojnë nga amnistia fiskale e qeverisë.
Siç mësohet janë mbi 100 mijë persona që po bëjnë regjistrimin e banesave të tyre nëpër hipoteka dhe pikërisht në këtë proces është vënë re fenomeni i ndërhyrjes për të kërkuar votën si shkëmbim i hipotekimit të shpejtë të shtëpisë.
Por ministri i drejtësisë i ri ndërhyri duke larguar disa drejtorë nëpër rrethe, që i takonin përgjithësisht LSI-së, e cila e ka kontrolluar këtë sektor për 4 vjet.
Në 12 qarqet e vendit janë shpërndarë prej një jave rreth 36 vëzhgues afatgjatë të ODIHR-it, të cilët po hartojnë një raport të posaçëm për fenomenin e blerjes së votës. Ky dokument do të bëhet prezent gjatë vizitës që do të zhvillojë pas një jave në Tiranë zyrtari i lartë i DASH, Hoyt Yee, i cili vjen më shumë për pengesën që ka hasur procesi i vettingut.
/tesheshi.com/
