Nga Blendi Gashi
(Mos)pjesëmarrja e numrit sa më të madh të grave në politikë dhe dominimi pothuajse total i burrave në udhëheqje si në nivelin qendror dhe atë lokal, shpeshherë çon pluhur jo pak në Kosovë.
Kjo ngjalli reagime edhe me rastin e formimit të qeverisë “Haradinaj” ku u emërua veç dy femra në post ministrore; Dhurata Hoxha e PDK-së (ministre e Integrimeve) dhe Albena Reshitaj e AKR-së (ministre e Ambientit), edhe pse premtimet nga këto parti ishin se do përparonin në këtë drejtim por në realitet nuk ndodhi.
Dhe për të treguar “shkeljen” e vërtetë që ju bëhet grave që merren me politikë dhe për të dëshmuar se edhe në ato pak raste emërimi i tyre bëhet në pozita sa për të thënë, pasi askush nuk i pyet gjë, u përkujdesën krerët e shtetit me shkuarjen në Bruskel, ku të gjithë politikanët ishin burrav, thua se udhëtuan për të bërë pleqni në ndonjë odë.
Presidenti Thaçi, kryeministri Haradinaj, kryekuvendari Veseli dhe tre zv.kryeministrat Pacolli, Limaj e Gashi të mërkurën bën “foton e ditës” me përfaqësuesen e BE-së, Frederica Mogherini (siç i quan fotot kryeministri shqiptar Edi Rama), ku i treguan Bashkimit Evropian se gratë në politikë Kosova i ka veç për numra dhe dekor e jo për gjë tjetër, pasi nuk e morën me vete asnjë duke i lënë t’i “kryejë punët e shtëpisë”.
Pa asnjë vraje ndërgjegjeje, “të fortët” e politikës e “lanë në shtëpi”, ministren për Integrime Evropiane, Dhurata Hoxha e cila është e thirrur të punojë për procesin e integrimit të vendit, çka kritikat zakonisht shkojnë në adresë të saj për çdo dështim.
Ajo e vëzhgoi si qytetare e thjeshtë lajmin pozitiv për rekomandimin për vizat, pra ju mohuan në një mënyrë ato edhe pak merita që mund të ketë për këtë arritje.
Ministrja Hoxha u pyet nga Televizioni Publik (RTK) pse ajo si njeriu kryesor në procesin integrues nuk ka udhëtuar në Bruksel ku me buzëqeshje tha se “dikush është dashur të qëndroi në shtëpi (Kosovë)”, ndërsa pas pak me gjysmë zëri pranoi se “fotografia e burrave” s’është diç për tu lavdëruar dhe se është dashur të jetë edhe një grua politikane prezentë.
Ndërsa në një intervistë dhënë në Rubikon të KTV-së, ajo “fajësoi” Mogherinin pasi tha se nuk mori ftesë nga ajo, duke lënë të kuptohet që për secilin prej atyre kishte ftesë.
Sipas Hoxhës, delegacioni kishte atë përbërje me qëllim të reflektimit të konsensusit të partive politike, ndonëse në delegacion ishin vetëm partitë e koalicionit qeveritar.
Dhe për t’ia vënë kapakun se falë punës së tyre ndodhi rekomandimi pozitiv, “burrat” pasi u kthyen të mërkurën nga Brukseli mbajtën një konferencë në ambientet e Aeroportit dhe sigurisht asgjë e re përveç mburrjeve dhe deklarimit se vizat do kryhen sivjet. /tesheshi.com/
