Kreu i parlamentit Europian, Martin Schulz u shpreh i pakënaqur me vendimin e liderit të radikalëve të majtë, Aleksis Cipras për të rinovuar koalicionin qeverisës me partinë e Grekëve të Pavarur.
Cipras e njoftoi këtë vendim, pasi shpalli fitoren e pastër e të papritur në këto përmasa në zgjedhjet e së dielës. Grekët e Pavarur janë një parti e vogël e krahut të djathtë. Gjatë fushatës Cipras kishte hedhur poshtë një propozim të partisë më të madhe të djathtë, Demokracisë së Re për një koalicion të gjerë.
Vota e së dielës i ka siguruar majtistit më të përfolur në Europë vijimësinë e të qënit figura kryesore politike në skenën greke, pavarësisht braktisjes së iu bë nga vetë partia e tij muajin e kaluar për shkak se Cipras, sipas radikalëve, u dorëzua dhe pranoi masat e kursimit në negociatat me kreditorët ndërkombëtarë.
Duke folur për një radio franceze, Schulz tha se nuk e kuptonte vendimin e Cipras, për të lidhur koalicion me një parti që mori më pak se 4 për qind të votave.
“I telefonova dhe e pyeta përse po vijonte këtë koalicion me një parti të çuditshme të së djathtës ekstreme”, tha Schulz.
Përgjigja, sipas kreut të parlamentit Europian, nuk ishte përgjigje. “Ai është shumë i zgjuar, sidomos kur flet në telefon. Ai më tha gjëra që duken bindëse, por që në sytë e mi janë të ekzagjeruara”.
Lideri i Grekëve të Pavarur, Panos Kammenos e kishte cilësuar paketën e ndihmës së kreditorëve ndërkombëtare si një fakt që e ka shndërruar Greqinë në një koloni.
Partia e tij ndryshon nga Syriza në shumë aspekte, sidomos për politikën e ashpër kundër emigrantëve dhe për lidhjet e ngushta që mbron mes Kishës Ortodokse dhe shtetit.
Schulz tha se e adimor Ciprasin për mënyrën sesi “lundroi” në politikën e muajve të fundit për t’u rizgjedhur sërish, por sipas tij, Kammenos është një armë e mbushur, që duhet mbajtur nën kontroll. /tesheshi.com/
