Një spot i veçantë me personazh Edi Ramën vijon të bubrojë në disa portale, dhuruar nga zyra e shtypit e kryeministrit. Bëhet fjalë për atë ku Rama bën policin që i vë gjobë një drejtuesi. Deri diku fabula funksionon, derisa vjen epilogu i saj që të bën të vësh duart në kokë, ose për të vjellë.
Gjobës i devijohet kuptimi dhe statusi i saj, duke u shndërruar nga një formë ndëshkueshmërie në funksion të edukimit, edhe ligjor, në një lloj takse plus që qeveria ia ngarkon shtetasit. Marrëzia në këtë rast është se kjo thuhet hapur. Kryeministri polic i thotë gjobëmarrësit se me gjobën e tij do bëhen këto e ato investime. Hapur kjo, pasi ka ndodhur të bëhet dhe fshehtaz. Kur? Aty nga mandati i dytë dhe i tretë i Ramës në bashku, ku nisi të aplikohej ganxha në rrotat e automjeteve të parkuara në kundravajtje.
Në dukje një ndëshkim shembullor në funksion të rregullit, por që qëllimi ishte krejt tjetër. Policët ganxhëvënës ishin të detyruar që çdo ditë të dorëzonin një shumë të caktuar në arkën e bashkisë. Pra, kishin një normë për të bërë dhe kjo i detyronte të bridhnin nëpër rrugët kryesore të Tiranës, për ta plotësuar atë me ganxhën e tyre hileqare.
Dhe ja ku vjen dita që ish-kryetari i Bashkisë, sot kryeministër, e pranon hapur këtë lloj strategjie, që nuk ka të bëjë as me ndërtimin e një shteti dinjitoz e aq më pak me themelimin e një sensi drejtësie karshi sjelljes ndaj qytetarëve. Në rastin konkret, është një përçudnim i tyre. Gjoba nuk është taksë. Dhe ta trajtosh si të tillë do të thotë që të shpërfillësh dhe çnderosh çdo logjikë të shëndoshë njerëzore dhe çdo mendim të shëndetshëm mbi shtetin dhe të drejtën.
Do ishte kurioze të dihej se me ç’argument e mbron fabulën e gjobës së shndërruar në taksë; por deri më tani, edhe pse ka dhënë disa intervista që nga momenti i publikimit, nuk është pyetur për atë që mund të konsiderohet si një ndër gabimet më trashanike të tij si shtetar. Sakaq, edhe pjesa më e madhe e medias dhe e opinionit është pajtuar me këtë gjë, duke zgjedhur të englendiset me spektaklin që ofron kreu i ekzekutivit në rolin e një polici.
Po si duhej të ishte përgjigja e Ramës ndaj shkelësit të semaforit, në emër të të bërit shtet?
“Unë gjobën do ta vë, sepse ti ke nevojë të edukohesh në zbatimin e ligjit, ti dhe e gjithë shoqëria. Ndëshkimi me gjobë duhet të jetë për ty leksioni bazë që një shoqëri duhet të funksionojë me rregulla. Gjoba duhet të jetë, dhe është gjithashtu për ty, në rastin konkret një masë mbrojtëse ndaj jetës të të tjerëve e po ashtu dhe tëndes”.
Më pas, ka lirinë ta menaxhojë si të dojë të ardhurën e asaj gjobe dhe të të tjerave; ta bëjë rrugë, shkollë, kopsht apo çerdhe.
Por dëshpërimisht nuk është kështu.
Polici? Nderim për njerëzit nën këtë uniformë, por nëse për një çast do spekullonim me portretizimin satirik që i bëhet kësaj figure në gjykimin popullor, do thonim se vërtet Rama është treguar një “polic i vërtetë” me atë spot.
Nëse do e tërhiqte nga qarkullimi, kjo do përbënte sinjalin më pozitiv, që, ashtu siç ka predispozitën e të bërit shtet, ka dhe atë të të qënit i drejtë ndaj njerëzve. Dhe sa keq kur shpresa se kjo mund të ndodhë, gati nuk ekziston! /tesheshi.com/
