Kryeministri i Kosovës, Isa Mustafa i kërkon Kuvendit të informojë deputetët për marrëveshjet e arritura në Bruksel, në dialogun me Beogradin. Në njoftimin dërguar Kuvendit, zyra e kryeministrit nuk harron të theksojë se këto marrëveshje të ndërmjetësuara nga BE përkrahen edhe nga Shtetet e Bashkuara.
Bashkë me kërkesën, në kuvend janë dorëzuar edhe tekstet e të gjitha marrëveshjeve, në tre gjuhë: shqip, serbisht dhe anglisht.
Qeveria shpreh gatishmërinë për debat të hapur dhe me argumente për çdo pikë të marrëveshjeve të arritura në Bruksel, si edhe për proceset të tjera të rëndësishme për Kosovën.
Një ditë më parë, debati në Kuvend për marrëveshjet e Brukselit u kërkua me ngulm nga opozita në komisionin e Ligjeve. /tesheshi.com/
