Lideri i Vetëvendosjes Albin Kurti me anë të një postimi në rrjetet sociale ka komentuar marrëveshjen e arritur dje mes AKR-së dhe PAN-it.
Kurti shkruan se pasi AKR doli nga LAA, apetitet nga njëra anë dhe pasiviteti nga krahu tjetër e humbën edhe një shans tjetër pas atij të VLAN-it.
“AKR doli nga koalicioni LAA. Ky koalicion parazgjedhor edhe zyrtarisht u shpërbë dje. Kot je pasiv që të mos bësh gabime, sepse pasiviteti është gabimi më i madh.
Mirëpo, dje u shpërbë edhe koalicioni tjetër PAN. Marrëveshjen me kryetarin e AKR-së nuk e bëri kryetari i PAN, por të tre kryetarët e tre partive (prej 12 sosh gjithsej) që kanë deputetë në legjislaturën e gjashtë.
Koalicionet parazgjedhore të oportunizmit po shthuren. Po kthehemi te partitë, përmasat e tyre, te ato si masë.
Pas marrëveshjes së mbrëmshme, konstituimi i Kuvendit të Kosovës dhe formimi i qeverisë së re është lënë në dorë të Vuçiçit.
Shteti nuk është karrike, por ka të tilla. Sikundër ka edhe karrike pa shtet, në kurriz të tij. Pushteti i varur nga Serbia, e var pavarësinë e shtetit.
26 vjet më vonë, 22 tetori i vitit 2017 po bëhet referendum i ri”, shkruan Albin Kurti.
