Ish-deputetit Mark Frroku mund t’i sekuestrohet një pasuri prej 1.7 milion eurosh. Prokurori i çështjes ia ka kërkuar gjykatës këtë masë, me pretendimin se ajo është një pasuri e pajustifikuar. Fjala është për apartamente e prona të shumta të ndodhura kudo në territorin shqiptar.
Ditë më parë Frroku u shpall i pafajshëm për akuzën e vrasjes së një shqiptari në Belgjikë, por tani ai rrezikon të mos e gëzojë më pasurinë për të cilën dyshohet se është vënë në forma të njohura tashmë të trafiqeve.
Ndërsa ditë më parë në gjyq, ai përdori një lloj alibie për pasurinë e tij duke thënë se kishte punuar ditë e natë, por pa sqaruar se në ç’lloj pune.
Mark Frroku u bë deputet duke u futur në listën e mazhorancës, si kryetar i një partie demokristiane. Në fillim emri i tij nuk u përfol, por pas disa muajsh gjatë parlamentit të pas-13 qershorit, ishte Jozefina Topalli ajo që e akuzoi mazhorancën se kishte në radhët e saj një ish-të dënuar për drogë të akuzuar për vrasje.
Që aty nisi kalvari politik e ligjor i Mark Frrokut, ku nga deputet në parlament përfundoi pas hekurave; ngjashëm si vëllai i tij Arben Frroku, i cili akuzohet për vrasjen e komisar Dritan Lamajt. /tesheshi.com/
