Petro Andriushchenko, një këshilltar i kryebashkiakut të Mariupolit, tha në Telegram se forcat ruse kishin njoftuar se do të mbyllnin të gjitha hyrjet dhe daljet nga qyteti i shkatërruar dhe paralajmëroi burrat që mbetën në Mariupol se ata do të “filtroheshin”.
Këshilltari, i cili nuk është në Mariupol, por po merr informacion nga qyteti i rrethuar, tha se rusët kishin filluar lëshimin e lejeve për të lëvizur nëpër qytet sot dhe publikoi një foto që tregonte qytetarët duke qëndruar në radhë për leje.
“Qindra qytetarë duhet të qëndrojnë në radhë për leje, pa të cilat nga java e ardhshme nuk do të jenë në gjendje jo vetëm të lëvizin midis zonave urbane, por edhe të dalin në rrugë”, shkroi Andriushchenko.
Në njoftimin e djeshëm, këshilltari i kryebashkiakut thekson se forcat ruse kanë njoftuar se qyteti “do të jetë i mbyllur për të gjitha hyrjet dhe daljet dhe ndalimi i lëvizjes ndërmjet vendbanimeve do të zgjasë shtatë ditë”. Andriushchenko deklaron, duke iu referuar informacioneve që ka marrë nga qyteti, se të gjithë burrat në qytet do t’i nënshtrohen procesit të “filtrimit”.
Kujtojmë, zyrtarët ukrainas dhe amerikanë pretendojnë se forcat ruse po “filtrojnë” civilët në zonat nën kontrollin e tyre. Kjo do të thotë se ata janë skanuar në mënyrë biometrike, telefonat e tyre celularë janë konfiskuar dhe në disa raste janë deportuar në Rusi kundër dëshirës së tyre.
Këshilli Bashkiak i Mariupolit ka njoftuar se “filtrimi” është pjesë e një plani më të gjerë rus për të mbuluar krimet e luftës të kryera në qytet. /tesheshi.com/
