Udhëheqësja e Frontit Kombëtar, partisë së ekstremit të djathtë në Francë, Marine Le Pen, ka deklaruar hapur të mërkurën se do ta kundërshtojë kandidaturën e të atit të saj, Jean-Marie Le Pen, në zgjedhjet e ardhshme rajonale për shkak të komenteve të tij se dhomat naziste të gazit ishin vetëm një “detaj në histori”.
Themeluesi i Frontit Kombëtar, 86-vjeçari Jean-Mari Le Pen, ka qenë në qendër të vëmendjes ditët e fundit, pasi ka shprehur pikëpamjet e tij mbi nazistët dhe ka mbrojtur Petain-in, udhëheqësin francez të kohës së luftës, i cili bashkëpunoi me regjimin e Hitlerit.
Vajza e tij është përpjekur që nga viti 2011, kur ajo mori drejtimin e partisë, t’ia heqë forcës së saj politike imazhin racist dhe antisemit. Ajo u shpreh se do ta kundërshtonte kandidaturën e të atit për të kryesuar listën në Francën jugore në zgjedhjet rajonale të dhjetorit.
“Pozita e tij si president nderi nuk e lejon atë ta marrë peng Frontin Kombëtar, të bëjë provokime të tilla të trasha që duket se kërkojnë të më dëmtojnë mua, por që fatkeqësisht godasin shumë ashpër tërë lëvizjen, zyrtarët, kandidatët, anëtarët dhe votuesit,” u shpreh ajo mes të tjerash. /tesheshi.com/
