Ankaraja zyrtare ka ndërmarrë një akt tjetër shtesë pas ndalimit të kërkimeve të naftës pranë ujrave qipriote. Në Mesdheun Lindor, ushtria turke ka nisur një stërvitje ushtarake në atë vend ku do të vendosej sonda italiane.
Stërvitja do të zgjasë deri më 10 mars.
E ashtuquajtura “Parcela nr.3”, sipas Ankarasë është pjesë përbërëse e zonës ekskluzive ekonomike turke. Por qeveria e Qipros greke autorizoi një sondë të kompanisë shtetërore italiane Eni që të fillojë kërkimet për gaz natyror në këtë parcelë.
Ndërkohë që anija italiane priste që këto stërvitje të filluara para 11 ditëve të përfundojnë, Forcat Detare të Turqisë njoftuan se kanë filluar përgatitjet për një stërvitje të re ushtarake. Ky vendim shkaktoi reaksion tek krerët e Nikosia-s dhe Athinës.
Krerët e Qipros greke kanë zhvilluar disa tendera për kërkime gazi në ujrat ende të pacaktuara si zonë të Qipros turke.
Kriza e fundit filloi me marrjen me qira të një numri të madh të parcelave detare nga ana e kompanisë italiane “ENI”, e cila në janar dërgoi anijen sondë “Saipem 12000” për të bërë shpime për gaz.
Kompania italiane “ENI” ka zbuluar një burim të mesëm të gazit natyror. Por, kjo anije ishte ndaluar më 9 shkurt nga ana e marinës turke.
Më pas Turqia publikoi një teleks navigacioni, që në terminologjinë detare quhet “Navteks”, ku thuhet se në këtë zonë do të organizohet një stërvitje ushtarake detare deri më 22 shkurt.
Hapi i dytë që hodhi Turqia ishte publikimi i Navteks-it të dytë, dy ditë para skadimit të afatit të stërvitjeve ushtarake, ku thuhet se për arsye të stërvitjes së dytë zona në fjalë do të mbetet e mbyllur deri më datën 10 mars.
Menjëherë pas publikimit të stërvitjes së re ushtarake, lideri i udhëheqjes greko-qipriote, Nikos Anastadiadis i telefonoi Kryeministrit të Greqisë, Alexsis Tsipras.
Në themelet e luftës për naftë dhe gaz natyror në Mesdheun Lindor qëndron problemi i zonës ekskluzive ekonomike. /tesheshi.com/
