Nga Mensur Krasniqi
Vetëm brenda një viti, Maqedoninë e kanë braktisur 4208 banorë. Këtë të dhënë e ka konfirmuar analiza e Entit Statistikor për Emigrantët. Sipas kësaj analize, numri më i madh i emigrantëve janë nga qyteti i Ohrit, 375, ndërsa në vendin e dytë sipas numrit të qytetarëve që e kanë lëshuar vendin janë banorë të Tetovës, 117.
Sipas përkatësisë etnike, më së shumti ka maqedonas, ndërsa në vendin e dytë janë shqiptarët. Përqindja më e madhe e emigrantëve, ashtu siç tregon analiza, janë persona që kanë profesionet e tyre. Ndërmjet tyre më në numër janë ata me arsim shkollor të mesëm, ndërsa në vendin e dytë janë personat me arsim të lartë shkollor.
Si destinacion më i preferuar për emigrantët janë Shtetet e Bashkuara të Amerikës, ku edhe janë shpërngulur një numër i madh i qytetarëve. Menjëherë pas SHBA-ve si destinacion i emigrantëve nga Maqedonia është Australia, pastaj Gjermania, Zvicra dhe Kanadaja.
Mbi arsyet për migrimin e qytetarëve nga Maqedonia në drejtim të vendeve më të zhvilluara, për tesheshi.com shprehet sociologu Fahmi Osmani. Sipas tij ka shumë faktorë që ndikojnë lidhur me këtë fenomen, mirëpo ai vëmendje të veçantë i kushton të rinjve që edhe përkundër nivelit të lartë arsimor që posedojnë, detyrohen të lëshojnë vendin, si pasojë e mospërfilljes së tyre nga shteti maqedonas.
“Mendoj se krizat e thella politike që e kanë kapluar shtetin janë ndër arsyet kryesore që kaë ndikuar në këtë numër të madh të të rinjëvë që kanë lëshuar shtetin. Dita ditës tek rinia edhe më tej shtohet pesimizmi dhe dëshpërimi mu nga ky shkak për arsye se nuk shifet nga udhëheqësit shtetëror se ka vullnet për ti zgjidhur problemet kruciale të një shoqërie siç është problemi apo çështja e punësimit të rinisë. Këtë e them nga shkaku se politika është sfera e cila e përcakton zhvillimin e të gjitha sferave tjera”, shprehet sociologu Fahmi Osmani.
Për Osmanin, është e domosdoshme që shteti në agjendën e vet të vendos si prioritet të parë këtë çështje, ndryshe do humbim shtresën më të pasur të qytetarëve, rininë.
Në bazë të informatave nga terreni, sipas ish kryetarit të Unionit Studentor Shqiptar, Daim Luçi, shifrat që ka publikuar Enti Statistikor nuk shfaqin pasqyrën reale të migrimit të shqiptarëve nga Maqedonia, meqë ky numër sipas tij është shumë më i lartë.
“Kjo shifër është edhe më e madhe, posaqërisht te shqiptarët, por edhe kështu siç është paraqet alarm të madh. Arsyet janë krejtësisht elementare, nga kushtet e pavolitshme të shkollave fillore dhe të mesme, pastaj gjendja e rëndë sociale si pasoje e papunësië së madhe, e deri te pasiguria qytetare si reflektim i diskriminimit politik dhe dhunës permanente që ushtrohet mbi qytetarët shqiptarë”, deklaroi për tesheshi.com, Daim Luçi.
Sipas tij, nëse së shpejti nuk ndërrmeret diçka në këtë drejtim, atëherë kjo dukuri do të merr përmasa edhe më të mëdha. /tesheshi.com/
