Pas marrëveshjes me shtetin fqinj Greqinë për ndryshimin e emrit të shtetit, Maqedonia ndodhet para një sfide të madhe, atë të referendumit në mënyrë që pastaj “Republika e Maqedonisë së Veriut” të shndërrohet si kategori kushtetuese me 2/3 e votave në Kuvend.
Partitë politike në qeveri tanimë janë duke diskutuar rreth idesë së hapjes së një shtabi të përbashkët euroatlantik, roli i të cilit do të jetë udhëheqja e një fushate pozitive për të votuar pro referendumit.
Në emisionin “VOX”, deputeti i Lëvizjes BESA, Rexhep Memedi ka bërë të ditur se pikërisht kreu i partisë së tyre, Afrim Gashi ishte ideatori i kësaj iniciative për shtab të përbashkët euroatlantik.
“Duke pasur parasysh peshën e këtij momenti historik ku përcaktohet fati apo ardhmëria e shtetit dhe qytetarëve të Maqedonisë, këtë propozim si ide e dha kryetari i Lëvizjes BESA, Afrim Gashi, i cili kishte për qëllim që të bëhet një fushatë e përbashkët e gjitha subjketeve të cilët do të senzibilizojnë opinionin dhe do të animojnë që ky referendum të jetë i suksesshëm për shkak se nga suksesi i këtij referendumit do të varet ardhmëria e shtetit dhe e gjithë qytetarëve. Nëse duam të çlirohemi nga ky izolim, nga ky shtet i dobët i cili prodhoi vetëm vuajtje dhe varfëri dhe padrejtësi për qytetarët e tij, atëherë patjetër që ne të angazhohemi seriozisht, gjithë aktorët politik”, ka thënë Memedi në emisionin “VOX”.
