Nga Mensur Krasniqi
Negociatat për formimin e qeverisë së re në Maqedoni me vëmendje të veçantë po i ndjek edhe faktori ndërkombëtar. Kështu, ambasadori britanik Carl Garet, në një intervistë për emisionin “360 shkallë” të Alsat-M, ka thënë se detyra kryesore e qeverisë së re është që ta çlirojë Maqedoninë nga robëria.
“Detyra e parë e qeverisë së re është që të ndryshojë atë që Komisioni Evropian e përshkruan si gjendje e një shteti të robëruar ose kidnapuar. Pra kjo është një detyrim i madh i qeverisë së re dhe jo sjellja e ligjeve aty këtu. Pra nevojitet ndryshim i sjelljes së institucioneve dhe i disa zyrtarëve të caktuar. Kështu që do të duhet kohë dhe mundim të kordinuar”, ka deklaruar Garet.
Në ndërkohë, ambasadori britanik ka rikujtuar prioritetet e Marrëveshjes së Përzhinos si kusht për formimin e qeverisë së re, ku në mesin e tyre është edhe zbardhja e rasteve që dalin nga bisedat e përgjuara të politikanëve nga ana e Prokurorisë Speciale.
“Po ashtu i kemi edhe dokumentet e rekomanduara nga BE-ja lidhur me reformat të cilat duhet ti ndërmarrin autoritetet qeveritare në Maqedoni, gjatë formimit të qeverisë së re. Të njëjtat janë edhe prioritet i Marrëveshjes së Përzhinos e nënshkruar nga liderët e partive politike si sektori i gjyqësisë, administrata publike, mediumet, lufta kundër korrupsionit etj. Paralelisht me këtë qeveria e re duhet që të hetojë rastet dhe përgjegjësitë që dalin nga bisedat e përgjuara. Në këtë drejtim faktori ndërkombëtar është e gatshme ta ndihmojë Maqedoninë”, ka shtuar Garet.
Ndryshe, kanë mbetur edhe 5 ditë nga skadimi i afatit për formimin e qeverisë me mandatar liderin e partisë fituese nga blloku politik maqedonas, VMRO-së, Nikolla Gruevski dhe atë të BDI-së, Ali Ahmetin.
Mirëpo një gjë është e sigurtë, se Gruevski disa herë me rradhë ka dalur me qëndrim publik se nuk do të pranon vazhdimin e mandatit të Prokurorisë Speciale, ndërkohë që vazhdimi i mandatit të këtij institucioni mbetet njëra ndër kërkesat më të rëndësishme të faktorit ndërkombëtar.
“Nuk ka nevojë ligjore dhe faktike që të vazhdohet puna e PSP-së, qëllimi i tyre është që të prolongohet kriza e imponuar, si tentim për ta larguar nga qeveria OBRM-PDUKM-në”, ka thënë Gruevski para disa ditësh në një intervistë për të përditshmen “Dnevnik”.
Sipas tij, është e qartë se PSP-ju punon nën sugjerimin e disa ambasadave dhe se dikush nga jashtë ka nevojë për një prokurore speciale, për të mbajtur peng një parti politike në Maqedoni. Ai thotë se, këto janë arsyet që VMRO-DPMNE nuk do të pajtohet për zgjatjen e mandatit të PSP-së.
Në fund Gruevski ka ripërsëritur qëndrimin e tij, se nëse vazhdohet mandati i PSP-së, gjithashtu do të vazhdohet edhe kriza politike.
Për dallim nga VMRO-ja, partia shqiptare me më së shumti deputetë të fituar në zgjedhjet e fundit, BDI në asnjë rast nuk e ka kundërshtuar vazhdimin e mandatit të Prokurorisë Speciale.
Dhe, duke pasur parasysh qëndrimet e kundërta të VMRO-BDI-së (faktorit ndërkombëtar), çdo ditë e më tepër po ngushtohet mundësia për formimin e qeverisë nga këto dy parti.
Sipas Kushtetutës, në rast se partia e parë fituese e zgjedhjeve nuk arrin të formojë qeverinë në afat prej 20 ditësh nga pranimi i mandatit, atëherë presidenti i shtetit është i detyruar që mandatin t’ia dhurojë partisë së dytë fituese të zgjedhjeve, në këtë rast LSDM-së. /tesheshi.com/
