Pas liderit të partisë opozitare maqedonase, LSDM-së, Zoran Zaevit, i cili për herë të parë para 2 javësh theu tabunë që një lider partiak maqedonas të vizitojë selinë e një partie shqiptare, dhe më konkretisht atë të Lëvizjes BESA, të njëjtën gjë ka bërë dhe lideri i LR-PDSH-së, Ziadin Sela, një e veçantë jo në rrafshin nacional por në atë politik, pasi janë kundërshtarë.
Ky takim ndërmjet Ziadin Selës dhe kreut të Lëvizjes BESA, Bilall Kasami ka pasditen e kësaj të mërkure pa ndonjë paralajmërim.
Pas takimit, Sela ka deklaruar se kërkon jetësimin dhe rikthimin e tryezave politike midis liderëve të partive politike njëjtë sikurse në Tiranë dhe Prishtinë që u zhvilluan menjëherë pas zgjedhjeve të 11 dhjetorit.
“Jam shumë i interesuar, jashtëzakonisht i interesuar të funksionojë tryeza e partive politike. Gjithë temat tjera aspak nuk janë në interesa të shqiptarëve. Është shumë e rëndësishme që shqiptarët të jenë bashkë, pastaj çështjet tjera gjejnë zgjidhje”, ka thënë shkurt për KOHA, kreu i LR-PDSH-së, Ziadin Sela i shoqëruar nga Sekretari i Përgjithshëm i partisë, Arben Taravari.
Ndërsa shefi i Kabinetit të kreut të BESËS, Faton Fazliu, ftesën e Ziadin Selës për tryezë të përbashkët me BDI-në dhe Ali Ahmetin e quan të barasvlefshme me me vetë aktin e tradhtisë që ua bën BDI-ja shqiptarëve të Maqedonisë
“Pas zotimit për Deklaratën e Përbashkët të Partive Shqiptare të Maqedonisë, të ulet të bisedohet me ata që paraprakisht janë deklaruar kundër dygjuhësisë dhe Prokurorisë Speciale Publike, është jo vetëm shkelje e parimeve të Deklaratës, por edhe tradhti ndaj të gjithë atyre që ndihmuan në arritjen e saj. Dhe, të kërkohet Tryezë e Përbashkët me këta aktorë, që nuk arrijnë ta mbajnë asnjë zotim të vetëm, jo vetëm që është nëpërkëmbje e vullnetit politik shqiptar, por është edhe abuzim me vullnetin e mirë për të bërë diçka të përbashkët shqiptare në Maqedoni. Prandaj, secila përpjekje që do ta ndihmonte koalicionin VMRO-BDI, duke kërkuar të ulemi bashkë me BDI-në për ta legjitimuar këtë veprim të saj, është e barasvlershme me vetë aktin e tradhtisë që ua bën BDI-ja shqiptarëve të Maqedonisë”, kështu ka deklaruar Faton Fazliu.
Ndërkohë, BESA disa herë me rradhë e ka përsëritur qëndrimin se të gjithë aktorët politikë përgjegjës për veprat kriminale dhe korrupsionin në shtet fillimisht duhet të japin llogari, pra të bëhet dekriminalizimi i politikës, e më pas mund të ulen në tryezë të përbashkët. /tesheshi.com/
