Një stërzgjatje e seancës konstituitiv të Kuvendit maqedonas, po e kthen atë në qesharak. Gjithsesi, ai është pasqyrues i ngërçit të pazakontë politik që po kalon vendi.
Në të 8-ën ditë të saj, kanë vijuar po ato lloj replikash mes palëve, duke e bërë të pamundur zgjedhjen e njerëzve në instancat drejtuese.
Madje në një moment, deputetë të LSDM-së e kanë lëshuar atë në shenjë proteste ndaj VMRO-së, duke pretenduar se kjo forcë po përpiqet që ta bllokojë vijueshmërinë normale të Kuvendit të ri.
Ndërsa nga pala shqiptare, ka qenë deputeti i lëvizjes BESA, Zeqirija Ibrahimi, i cili në fjalimin e tij është përqëndruar sërish tek çështja e dygjuhësisë. Ai iu është drejtuar kolegëve maqedonas nga krahu i VMRO-së, duke iu thënë se nuk kishte takuar njeri në botë që të qe kundër gjuhëve dhe se i vinte keq që disa deputetë të kësaj partie i frikësojnë qytetarët në lidhje me zbatimin e dygjuhësisë.
“Mua nuk më pengon asgjë që gjuha maqedonase të jetë në Shqipëri dhe Greqi e as në Kanada. Nuk e kam të qartë se si kolegët tanë deputetë frikësohen nga gjuha shqipe. Të nderuar, ne kemi shumë shembuj në botë ku janë zyrtarizuar gjuhët ku pakicat janë shumë më pak, si p.sh. Kosova dhe Finlanda, të mos flas për shembuj tjerë”, tha Ibrahimi.
Ai ka shtuar që deputetët duhet të jenë shumë të kujdesshëm me kualifikimet për gjuhën shqipe duke shtuar se me zyrtarizimin e saj do të zgjidhet një problem në Maqedoni. M. Krasniqi – /tesheshi.com/
