Edhe pak ditë dhe në Maqedoni votohet për krerët e komunave në kuadër të zgjedhjeve lokale, një tjetër test i fortë politik fill pas ndryshimit të pushtetit në këtë vend, jo me pak vuajtje.
Ndërkohë, tek faktori shqiptar gjithçka është e përqëndruar tek gara mes BESËS dhe BDI-së, sidomos për komunën simbol, atë të Çairit në Shkup, të cilën partia e Ali Ahmetit e humbi me vota që në zgjedhjet e përgjithshme, pikërisht nga BESA që e rrëmbeu si bastion në tregues elektoralë.
Tashmë synimi është marrja e drejtimit të kësaj komune nga kjo e fundit, ku kandidat është Zeqirija Ibrahimi, nr. 2 i BESËS, një ndër shqiptarët më të përgatitur intektualisht në Maqedoni. Madje në këtë prizëm ishte interesante goditja që ai morri nga rivali i BDI-së, i cili e quajti Ibrahimin filozof të parealizuar, pa e kuptuar se nëse është filozof, përbën një alogjizëm prapafjala “i parealizuar”. Ai mund të thoshte “i parealizuar në dëshirën për të qenë filozof”, ndërkohë që Ibrahimi nuk e ka quajtur ndonjëherë veten të tillë. Ai përfshihet tek mendimtarët publikë, me një karrierë të gjatë e gjurmëlënëse në sferën e komunikimit. Së fundi, Ibrahimi ka realizuar një takim me një grup të rinjsh të afirmuar në fusha të ndryshme, një kastë shqiptarësh të së ardhmes, siç përshkruhet dhe në shënimin e njërit prej tyre.
“Akrepat e orës po fillojnë t’a tregojnë kohën saktë tashmë. Pendën që na e morën, po e kthejmë përsëri që të shkruajmë. -Inxhinierë të softuerëve, inxhinierë të makinerisë, ekonomistë, mjekë, inxhinierë të gjenetikës, inxhinier të gjeodezisë, arkitektë të ndërtimtarisë, gjuhëtarë, farmaceut, diplomues në punë dhe politikë sociale, ekspertë të IT-së, fotograf e sipërmarrës – gjithë në një vend. Ky rizgjim e këto kapacitete doemos të vihen në shërbim të përmirësimit të jetës së qytetarëve. Për Çair e për mbarë gjeografinë tonë kombëtare!” /tesheshi.com/
