Nga Mensur Krasniqi
“Kryqi gjigant” vazhdon të mbetet shqetësim i madh për partinë shqiptare në pushtet në Maqedoni. Kryesia Qendrore e Bashkimit Demokratik për Integrim ka paraparë një mbledhje urgjente sot në Tetovë ku do të vendoset se cilat janë veprimet që do ti ndërrmarin në lidhje me kryqin e lartë 55 metra, që Kongresi Botëror Maqedonas planifikon ta ndërtojë në komunën e Butelit, ku pjesa dërmuese janë nga komuniteti shqiptarë dhe myslimanë.
Zyrtarët e lartë të BDI-së do të japin raport për zhvillimet e fundit në Butel dhe do të vendoset për hapat institucionale me qëllim për të penguar vendosjen e kryqit që sipas tyre provokon komunitetet e bashkësive tjera etnike dhe fetare në Maqedoni.
Të rikujtojmë se BDI ka kundërshtuar vendosjen e kryqit, edhe atë nëpërmjet dy protestave ku pjesëmarrës ishin edhe zyrtarët më të lartë të kësaj partie, me ç’rast edhe kishin demoluar gurthemelet e kryqit, dhe kanë vendosur çadra në shenjë proteste.
Nga BDI kishin paralajmëruar se nuk do të tërhiqen nga ai vend derisa Këshilli Komunal i komunës së Butelit të tërheq vendimin për vendosjen e kryqit. Mirëpo protesta e tyre nuk zgjati më shumë se një natë, meqë ata çmontuan çadrat dhe lëshuan vendin duke deklaruar se është arritur Marrëveshje ndërinstitucionale me ndihmën e faktorit ndërkombëtar që kryqi të mos ndërtohet.
Ndërsa nga ana tjetër, qytetarët maqedonas të Butelit bashkë me krerët e Komunës, dje protestuan para Ministrisë së Punëve të Brendshme, duke kërkuar kështu nga kreu i këtij dikasteri, Oliver Spasovski sigurimin e vendit ku do të vendoset kryqi. Kreu i Butelit, Petre Llatinovski hodhi poshtë zërat se vendimi për ndërtimin e kryqit është shfuqizuar.
“Të gjithë zërat se vendimi për ndërtimin e kryqit në Butel është i shfuqizuar, i hedhë poshtë si të pavërtetë. Nuk ka asnjë marrëveshje deri më tani mes meje si kryetar i Komunës Butelit dhe kryetarit të Komunës Çairit,Izet Mexhiti”, ka deklaruar Petre Llatinovski.
Ndërsa sipas kryetarit të Këshillit Komunal të Butelit, Bobi Bojçevski, vendi ku duhej të ndërtohet kryqi është uzurpuar nga njerëz të komunave të ndryshme, andaj ai paralajmëron organet e Brendshme që të sigurojnë vendin dhe kushtet për ndërtimin e kryqit, ndryshe protestat nuk do të ndalojnë.
Protesta e qytetarëve të Butelit vjen dy ditë pas protestës së Kongresit Botëror Maqedonas, i cili poashtu kërkoi mundësimin e kushteve për ndërtimin e kryqit, si dhe largimin e shqiponjës që BDI e vendosi para një muajsh në rreth-rrotullimin në Fushtë Topanë të komunës së Çairit, dhe vendosjen e bustit të Fan Nolit, si themelues i Kishës ortodokse shqiptare. /tesheshi.com/
