Si duket, ngjarja e trishtë në Lagjen e Trimave në Kumanovë, ende nuk është kaluar në harresë nga qytetarët e këtij vendi, për më tepër nga maqedonasit e angazhuar me politikë . Andaj, dje anëtarët e Forumit Rinor të Lidhjes Socialdemokratike nga Kumanova, në urën te fabrika Iskra, në hyrje të qytetit e vendosën një baner në të cilën është shkruar: “Kumanova nuk do të harrojë, Lagja e trimave, 9.5.2015”.
Ata pyesin se pse edhe pas disa muajve nuk ka përgjigje për ngjarjet e 9 dhe 10 majit, kur 8 policë u vranë, 14 të tjerë u plagosën dhe u shkaktua një dëm i madh material.
“Deri më sot ende nuk ka asnjë zgjidhje për rastin që ndodhi në lagjen tonë. Kush me të vërtet qëndron prapa incidentit? A është realizuar një skenar i zi? A ishte ky një tentim politik për destabilizim? Kush lejoi që tetë polic të vriten dhe të ketë dhjetëra të lënduar? Nuk ka përgjegjësi nga askush. Nga ky vend, me vendosjen simbolike të këtij baneri, duam që të dërgojmë porosi se Kumanova nuk do të harroj”, deklaroi Vladislav Trajkovski, kryetar i Forumit Rinor të LSDM-së dega në Kumanovë.
Trajkovski theksoi se gjatë secilës hyrje në Kumanovë, baneri do t`i kujtojë kryeministrit Nikolla Gruevski dhe opinionit se sa dëm u ka sjellë ai qytetarëve, ndërsa pas ndërrimit të pushtetit në prill të vitit 2016 do të zbulohet e vërteta. /tesheshi.com/
