Nga Ylli Pata
Mediat e Kosovës kanë spekuluar sot mbi një lajm për seleksionimin e gjashtë dëshmitarëve që do të përdoren nga Gjykata Speciale për të akuzuar ish-komandantët e Kosovës.
Koha Ditore shkruan se të paktën gjashtë persona që do të dëshmojnë në Gjykatën Speciale për krimet e luftës në Kosovë janë larguar nga Kosova.
Ata janë sistemuar në vende të ndryshme, në pritje të proceseve që do të nisin pas themelimit të Gjykatës Speciale. Këta dëshmitarë të mbrojtur janë nga rajoni i Drenicës, Lipjanit dhe Shtimes.
Autoritetet kosovare nuk janë të përfshira në transferimin dhe mbrojtjen e dëshmitarëve. Madje, sipas gazetës, as që janë të njoftuar zyrtarisht se shtetas kosovarë janë larguar në drejtim të vendeve të tjera, të cilat nuk bëhen të ditura.
Por siç mësohet, ky është vetëm një spekulim fundjave “pa lajme” edhe pse realisht bëhet fjalë për një operacion të organizuar mirë, ku janë siguruar një numër “dëshmitarësh” nga EULEX, por pa u ngritur ende institucionet e Gjykatës Speciale.
Pak kohë më parë, denoncimi për këtë ka ardhur nga gazetari Milaim Zeka, i cili e njeh shumë mirë këtë çështje dhe pritet që prej tij të dalin së shpejti gjëra të reja.
Në një intervistë televizive, Milaim Zeka tha disa muaj më parë se dëshmitarët e Gjykatës Speciale tashmë janë nxjerrë jashtë shtetit për shkaqe sigurie.
“Është një listë tjetër që do të akuzohen dhe denohen njerëzit e korruptuar, edhe ka persona që nuk do kanë qenë fare në luftë por vetëm për korrupsion”, tha Zeka.
Të martën mbahet në Prishtinë një gjyq që Milaim Zeka ka me EULEX pas publikimit të disa fakteve të gazetarit mbi gjykimet për dosjet e UÇK-së, process që pritet të nxjerrë “xhevahire speciale” nga hetimet. /tesheshi.com/
